ORANJESTAD (AAN) – Den conferencia di prensa di gobierno, cu a tuma lugar na Instituto Medico San Nicolas, su director docter Joel Rajnherc,
a hiba palabra y a splica kico ImSan su rol ta den e esfuerzonan aki pa vacuna mas tanto hende posible na Aruba.
“Nos no a organiza esaki, pero mirando cuanto hende kier wordo vacuna, nos ta mira cu hopi hende di edad halto, ta biniendo ta haciendo esfuerzo pa bin akinan, nos atrobe, a habri nos portanan paden di ImSan pa vooral, e hendenan di edad, nos saca nan foi solo y pone nan mas confortablemente, duna nan e vacuna y zorg pa nan keda den bon condicion.
Esaki ta, eigenlijk, un muestra di cuanto hende pariba di brug tabata wardando riba e oportunidad pa haya e vacuna mas cerca di cas”, asina dr. Rajnherc a declara.
Dr. Rajnherc a gradici Gobierno, e grupo di Rampenbestrijding Bureau, y DVG pa tur e esfuerzo cu nan ta haciendo pa vacuna mas hende posible na Aruba.
El a agrega cu esaki su so kizas no ta e solucion pa no haya e infeccion, pero ta zorg pa e persona no ta mira malo, y pa evita cu hospital pabao di brug bira asina yen di pashent cu no por duna e cuido. “Nos no kier cay bek den e situacion, cu e cuido cu nos tin cu duna regularmente no por tuma lugar. Nos kier zorg pa nos por sigui trata tur otro sorto di malesa, cu tambe nos hendenan tin. Hendenan cu haya accidente cu tin cu bay den ICU mester tin lugar pa nan, y hopi di nos propio empleadonan tambe ta haya e infeccion, y no por traha mesora. Pues, nos tin cu busca manera pa bay guera cu e virus aki, y no tin miedo pa tuma e vacuna. Nos ta hopi gradici pa e apoyo cu nos a haya, mi ta hopi orguyoso riba e bon colaboracion entre e gruponan trahando akinan, vooral e grupo Rampenbestrijding, DVG y ImSan”, director Rajnherc a expresa.
El a reitera su gradicimento na un y tur y specialmente na su empleada dr. Monica Nuboer, pa su esfuerzonan pa haci un bon organizacion.
