Unity Aruba Team Briya na Torneo Internacional di Baseball JMD na Punta Cana

ORANJESTAD (AAN):  Unity Aruba Team, bao guia di Coach Dwaine Felida y su coaching staff,

ta sigui haci un excelente impresion den e 16to Torneo Internacional di Baseball JMD na Punta Cana. Door di hopi dedicacion, disciplina y bon preparacion, tanto e ekipo U10 como e ekipo U8 a logra clasifica pa e cuarto final, cu lo hunga awe mainta na 9:00am.

Ademas di e ekipo di Unity Aruba, varios otro hoben pelotero Arubiano tambe ta representando nos isla cu hopi orguyo. CJ Roosberg y Shondrick Solognier ta competi cu Team Panama den categoria U12, mientras cu Cayden Fraser y Ray-Zion Jack ta haci un excelente papel cu Team di Merca den categoria U14.  E team di Merca aki a logra clasifica pasa pe cuarto final, un logro cu ta confirma e alto nivel di talento cu Aruba tin den baseball.

Mas cu gana of perde un partido, e torneo ta ofrece un experiencia unico pa e muchanan. Durante e evento nan tin e oportunidad pa hunga contra ekipo di diferente pais, crea amistad internacional, conoce otro cultura y siña con pa competi na un nivel mas halto.

Un di e aspectonan mas special di e torneo ta cu e hobennan pelotero por conoce personalmente ex hungadornan di MLB Omar Vazquez, scout reconoci Jose Fortuna y hopi otro scout profesional, coach y lidernan di baseball cu ta presente pa observa talento, comparti nan conocemento y inspira e proximo generacion di peloteronan.

Experiencianan manera esaki ta forma caracter, aumenta confiansa y motiva e muchanan pa sigui traha duro pa logra nan soñonan. Aruba por sinti orguyo di e representacion cu su hoben atletanan ta mustra na escenario internacional.

Hopi suerte na tur e peloteronan Arubiano den e cuarto final. Aruba ta hunto cu boso!