ORANJESTAD (AAN): Den fin di siman na Club Sportboys na Santa Cruz a tuma lugar un fiesta tipico, unda cu a reconoce e baluarte Soraida Boekhoudt, pa su increibel aporte na e club, di cual e ta presidente.
For di aña 2000 Boekhoudt tabata boluntario di Club Sportboys y tabata yuda cu muchanan chikito di futbol, despues di cual el a bira secretaria.
El a yuda cu varios evento di entre otro futbol, domino y hisamento di fli.
Durante su tempo cu Sportboys el a haya sa tur cos di e club, via tur esnan cu tabata maneha e club incluyendo su presidente.
Na 2016 Boekhoudt a bira presidente di Club Sportboys y te awe e ta traha na un manera boluntario pa mantene e club y hacie un lugar alegre pa tur hende bishita y relaha por ehempel despues di trabao.
Mas ainda e presidente di Club Sportboys ta organisa training di futbol, domino, fiesta di bario, fiesta San Juan, fiesta social, mientras cu principalmente e ta stimula e muchanan di bario pa bin hunga.
Durante e anochi festivo e baluarte di Santa Cruz Soraida Boekhoudt a ricibi su bunita reconocimento.
https://diario.aw/fr/categories/noticia/deporte/soraida-boekhoudt-a-haya-reconocimento-special-pa-su-aporte-pa-club-sportboys#sigProId4f64c2f081
