October lo habri cu Dragrace ‘Caribbean Shootout 2024 Mega Jet car Invasion’

Brazilian Flash celebrando 35 aniversario

• Despues di 14 aña lo tin un Jet car bek na Aruba
• Autonan ta bin di Curaçao y Puerto Rico tambe 

ORANJESTAD (AAN): Durante un conferencia di prensa convoca na Double Down Sports Bar & Grill, e organizacion local di Brazilian Flash Racing Team as tene un conferencia di prensa, pa asina anuncia un evento grandi cu nan ta preparando pa comienzo di otro luna, y lo inclui Jet car.

   Historia di Brazilian Flash: Tito Tromp a duna un historia di nan organizacion.  Na 1989, e mes cu su rumannan y varios amigo di bario a cuminza traha riba un auto di careda, y tabata basa riba un Chevrolet Camaro.  Nan a traha dia y anochi pa asina por bay participa na caredanan di fin di aña, cu e tempo ey tabata yama “Pan American Race of Champions”.

   Na October 1989 nan a logra di estrena nan Camaro, cu a carga e nomber di ‘Brazilian Flash Racing’.  Di e forma ey nan organizacion a cuminza yama Brazilian Flash Racing Team.

   Añanan a pasa, e ekipo di Brazilian Flash a crece y a moderniza tambe.  Actualmente nan tin 3 Dragster, y 3 Junior-Dragster.  Nan ta participa na tur careda local y nan a bira conoci di ta un team cu ta duna tremendo bataya riba pista.

   Pa e organizacion aki, Drag Racing ta mucho mas cu un deporte.  Drag Racing ya a bira parti di famia.

   Caredanan di Drag Race: Den cuadro di celebracion di 35 aña di Brazilian Flash Racing Foundation, nan ta organizando un evento fenomenal di Drag Race pa asina por celebra cu comunidad completo.

   Tito Tromp a bisa cu e evento lo carga e titulo di ‘Caribbean Shootout 2024 Mega Jet car Invasion’.  Esaki lo bay ta dianan 3, 4, 5, y 6 di October 2024 na pista di Palo Marga.  Esaki lo bira e prome evento grandi di Drag Race riba e pista full renoba na Palo Marga.  Participantenan ta auto y motorcycle.

   Di Curaçao y Puerto Rico: Tito Tromp a splica, cu di Curaçao lo bin 7 auto di careda, 2 Dragster, 2 Junior Dragster, y 12 Motorcycle.  For di Puerto Rico ta bin nan gran amigo Carlos Diaz cu su Vega Wapacha.  Ta bin tambe su yiu homber Carlito y un otro amigo Pepe di Puerto Rico cu lo bay core e Dragsternan di Brazilian Flash cu bandera di Puerto Rico.  Nan a pidi pa Brazilian Flash huur nan auto na nan, y como cu e organizacion local no tabatin intencion di core e dos Dragsternan di Brazilian Flash, hunto cu e Wapacha Vega ta bay core bao di e bandera di Puerto Rico.

   Como atraccion special lo bay tin e Bataya grandi di Aruba vs. Curaçao den categoria ‘Import’, pa mira cua di e paisnan aki tin e Import mas veloz pa saca un ganador cu ta bira sea Curaçao of Aruba.

   Tambe e atraccion special lo ta e Jet car, y esaki ta special pa haci muchanan contento.  Segun Tito Tromp, tin mas cu 10 aña cu un Jet car no a bin Aruba.  Pero otro luna despues di warda como 14 aña, lo bay tin uno atrobe na Aruba pa mustra con rapido e por core riba pista di Palo Marga.

   Car Show tambe: Nan patrocinador Eagle Aruba Resort y Double Down Sports Bar & Grill ta dunando un man, y nan tambe ta preparando un Car Show den cuadro di e celebracion di Brazilian Flash.

   Janith Agunbero kende ta director di mercadeo na Eagle Aruba Resort, a splica cu ta trece algo extra pa Aruba, y ta tene un Car Show cu ta tuma lugar awe Diabierna 27 di September 2024 riba e parkinglot grandi di Double Down Sports Bar & Grill.

   Lo tey presente tur e autonan participando den e ‘Caribbean Shootout 2024 Mega Jet car Invasion’ pa asina pueblo bay disfruta di e evento aki.  Lo tin animacion musical di DJ Splash cuminsando pa 6:00 pm, y banda musical di ‘N Fuzion pa anima publico for di 8:00 pm te cu 10:00 pm.