Jeffrey Nedd a wordo honra cu Reconocemento O.L.Y. como “Olympian For Life”

ORANJESTAD (AAN): Recientemente durante Premio Excelencia den Deporte a reconoce 4 atleta olimpico.

Presidente di Asociacion Arubano di Atletanan Olimpico, Sr. Isnardo Faro a haci entrega di un certificado y pin di Olympians for Life (OLY) pa nan esfuerso y promove e balornan olimpico.

   Jeffrey Nedd, miho conoci como Jeff a participa cu e edad di 31 aña den e deporte di boxeo den e categoria di 75-81 kilogram (light heavy weight) na Weganan Olimpico na Seoul, Sur Korea na aña 1988.

   Sr. Jeff su logronan internacional mas importante ta e.o. como lo siguiente: (*) Na aña 1984, ora cu el a gana e campeon hubenil di Santo Domingo Guillermo Mejia. (*) Na aña 1988 el a gana e medaya di plata na e Torneo Internacional Bataya de Carabobo na Venezuela.  (*) Riba 12 di mei 1989 durante e di 10 aniversario di Aruba Boxing Association, el a gana Harold Aroyo (campeon di Puerto Rico den e division di super heavyweight y medayista di oro di e Campeonato Bataya di Carabobo na Venezuela e aña anterior).

   Sr. Jeff su logronan den e mundo deportivo ta un ehempel bibo di e cuater D-nan pa tin exito, cual ta deseo, disciplina, dedicacion y determinacion. Minister Endy Croes ta felicita Sr. Jeffrey Nedd pa su exitoso logronan deportivo.