Evento importante di MMA Referee Foundation a tuma lugar

ORANJESTAD(AAN): Recientemente MMA Referee Foundation a tene un evento, unda cu entre otro Botica di Servicio ta contribui na dje.

Assistant Managing Director di e botica Franz Sydow a splica cu nan ta yuda cu diferente articulo manera ‘first aid kit’, hand sanitizer etc. y segun Sydow, asina por yuda comunidad via e trabaonan tambe di Andres Tromp.

John Anthony Tromp di Instituto Medico San Nicolas (IMSAN) a splica cu e ta parti di un centro di training di American Heart Association y locual su parti tabata den e evento di e fundacion ta pa duna training di entre otro ‘Basic Life Support’ cu ta inclui CPR y uso di un defibrillator automatico, na un nivel profesional.

A duna tambe demostracion y entrenamento di metodonan di prome auxilio, pa yuda no solamente den casonan di paro cardiaco of otro problemanan di curazon.

Durante e curso a enfoca tambe riba emergencianan medico cu bringadornan por haya mes aden durante e competencianan na cual nan ta participa.

Andres Tromp di MMA Referee Foundation a splica cu e curso durante e evento a wordo patrocina pa IMSAN, unda cu refereenan a haya diferente curso pa siña e mihor maneranan pa atende cu cualkier problema medico of di lesion cu por presenta durante un pelea.

E metodonan cu nan a siña por wordo uza tambe na cas of den cualkier otro situacion di emergencia.

Tromp a gradici tur cu a coopera cu e evento y a indica cu tin mas curso y evento na caminda.