E historia rico y formidable di Don Flip Racing

SPEEDWORLD

Un saludo cordial na mi lectornan di Speedworld, cu bo sirbidor Hubert ‘The Furai’ Tiel, y awe oficialmente ta ofrece mi felicitacion na e organisacion di Don Flip Racing, cu ta observando nan di 50 aniversario di existencia.

   Desde aña 1973, nan a cuminza participa den deporte di pustamento, y nan contribucion na Drag Racing na Aruba y tambe Curaçao tabata un gran empuhe pa e fanaticonan bira aun mas grandi.

   Nan prome auto tabata un Chevrolet Malibu cu nan a tuma di famia Varis, y cu esaki nan a hasta participa na Curaçao cune.  Despues di esey nan di dos auto a bira un Ford Pinto.  Nan a logra cu mecaniconan pa fit un motor V-8 den e vehiculo.  Despues a cumpra un Gearbox di famia Orman pa pone esaki den dje.

   Don Flip Racing cu e Malibu y Pinto tabata sigui avansa y ora di haci prueba, nan tabata bay cu e auto aki te na Barcadera of Malmok pa purba test motor.

   Famia Werleman na comienso mes tabata driver durante caredanan, y asina a expande cu demas miembronan di bario cu a cuminsa yuda y despues a upgrade nan mes pa driver.

   Don Flip Racing tabata un di e organisacionnan cu a expande rapidamente y a participa semper cu minimo 2 auto, y despues a expande pa 5 auto di careda.  Awor na 2023, nan ta dispone di 7 auto di careda.

   Despues a haci e grupo bira Don Flip Racing Foundation, y asina a yuda pa haci evento pa recauda fondo pa asina cubri e gastonan halto di e deporte di motor.  Nan ta yuda cu hopi evento social, incluyendo Carnaval.

   Un palabra di pabien na famia Werleman di Don Flip Racing, y danki pa a engrandece deporte di motor cada dia mas y mas.