Comite Olimpico di Aruba a reuni cu atleta di Beach Tennis Aksel Samardzic

Cla pa representa Aruba den e siguiente Ciclo Olimpico

ORANJESTAD (AAN): E siman aki, miembronan di Direccion di Deporte di Comite Olimpico Arubano tabata tin e placer di sinta na mesa cu un atleta cu tin mas cu un decada ta saca cara pa Aruba den e deporte popular di “Beach Tennis”, esta Aksel Samardzic.

   Ademas di mira hopi exito como atleta den e eventonan single, duo y mixed den e circuito profesional, no por lubida cu Aksel, hunto cu parnternan Sander Castro y Dominique Hopman a logra varios medaya pa Aruba na e Weganan di “ODESUR Juegos de Playa Rosario 2019”.

   Aksel sigur ta un di e atletanan elite di Aruba, unda cu e ta den e top di mundo pa loke ta trata ranking di Beach Tennis di e federacion internacional di Tennis, ITF. Awe 5 aña despues di e momento bunita ey, Aksel ta bek na mesa cu COA, pa mira kico tin riba bista manera un proximo oportunidad pa por representa Aruba den Weganan di e siguiente Ciclo Olimpico 2025-2028.

   A probecha di e reunion aki, pa alabes sinta y combersa riba e tema aki cu presidente di Tennis Aruba, Sr. Franz Sydow, cu sigur ta percurando pa desaroyonan positivo dentro di e disciplinanan di tennis na Aruba. Importante pa nota cu e idea di Aksel representa Aruba sigur ta algo positivo y cu tur hende na mesa kier mira esaki pasa, pues lo cuminsa e proceso pa asina inclui Aksel den e planificacion pa e siguiente aña.