Atletanan di Natacion Open Water ta conta di nan experiencia na Santo Domingo 2026

ORANJESTAD (AAN): Despues di a competi na e Weganan Centroamericano y di Caribe Santo Domingo 2026 den

e deporte di Natacion Open Water, atletanan di TEAMARU Britta Schwengle y Jayrick Winterdal ta comparti nan experiencia y con e evento a bay den ambos modalidad, 10km y e 3km “knockout”.

   Jayrick a splica cu el a participa pa prome biaha den careda di 10km internacionalmente, y aunke el a haya e ruta hopi bruto y temperatura di lama basta cayente, pero den su opinion el a haci su best y a logra finaliza e ruta tambe.  Su careda di 3km den su opinion, por a bay miho sinembargo cansancio di e dia anterior a dal’e trempan den su 3km knockout, y a cay afo basta trempan.

   Jayrick ta gradici su coachnan y ta contento cu sosten cu nan a ricibi.

   Britta na su turno a splica cu su careda di 10km a bay bon, y a sali na di Puesto #6 overall den tempo di 2:22 ora.  E ta contento cu su resultado di 10km.

   El a splica cu su caredanan di 3km a bay basta bon, y a sali na Puesto #4.  El a mustra cu e dos atletanan Mexicano cu a ocupa e prome y di dos puesto, a bin basta bruto, y e atleta Venezolano cu a sali na Puesto #3 ta un mucha muhe kende tin hopi experiencia, y Britta ta contento cu el a landa banda di dje, pa asina siña su tacticanan.

   Tanto Jayrick y Britta ta hopi agradecido na Comite Olimpico Arubano, y tur esnan cu a sostene nan na cas, nan famia, y ta gradici esnan cu a bay yuda nan te na Republica Dominicana.

   Comite Olimpico Arubano ta gradici ambos atleta pa e tremendo esfuerso cu nan a haci y cu a representa Aruba dignamente.