NASSAU: Henter pais di Bahamas ta na luto, y expresando condolencia na ex-Prome Ministro Hubert Ingraham y su famia, pa cu e fayecimento di su yiu muher Kelli Ingraham.
Segun Bahamas Press, siman pasa a core hiba Kelli pa Hospital na Merca pa ricibi tratamento despues di un malesa cortico, cu segun prome detaye no ta un malesa cu por ocasiona morto.
Pero el a fayece Dialuna, net un luna despues cu el a celebra su di 45 cumpleaño.
Den un declaracion, actual Prome Ministro Philip Davis a ofrece condolencia na e famia bisando: “No tin palabra pa expresa completamente e dolor di perde un yiu, y mi por djis imagina e dolor cu e y su famia ta pasando aden.” Davis a sigui bisa: “Ami cu Ann ta ofrece nos condolencia di mas profundo y ta haci oracion cu nan por haya forza den e amor y sosten di esnan rond di nan durante e momento dificil aki.”
Prome Ministro interino, Chester Cooper tambe a extende condolencia na famia Ingraham. “Kelli tabata energetico, yen bida y cu semper un fenomenal sentido di humor, cu su metanan fiho den bida,” el a declara.
Kelli Ingraham tabata miembro di e Council di Abogadonan di Bahamas, y tambe miembro di The Bahamas Financial Services pa varios aña.
