Eduard Pieters di PPA ta convenci
ORANJESTAD (AAN): E miembro di Partido PPA, Eduard Pieters e siman aki a trece dilanti na prome luga nos mester felicita secretario general di PPA señor Otmar Oduber cu su caso den corte di prome instancia. Cu e veredicto di huez, sr. Oduber por sigui representa PPA den Parlamento di Aruba y nos ta convenci cu e lo sa di defende nos pueblo.
Na di dos luga, Diabuebs 29 di januari 2025 Aruba por a sigui un encuentro publico caminda e prome minister demisionario di Aruba Señora Evelyn Wever-Croes a duna informacion na parlamento. Por conclui cu Gabinete Wever-Croes a haci nan esfuerso pa negocia cu Hulanda no obstante e situacion cu Aruba tabata aden. Tambe nos por a compronde cu varios mocion a worde entrega pa yega na un acuerdo cu Hulanda riba un posibel implementacion di un Rijkswet.
Mientrastanto tempo ta sigui pasa y prome cu dia 1 di mei 2025 Parlamento di Aruba mester tuma un decision riba un Rijkswet cu ainda no ta conoci pa Parlamento di Aruba.
Por compronde cu gabinete demisionario ta na mesa di negociacion ainda, sinembargo ta mas cu logico cu Hulanda kier mira cu nos politiconan na Aruba ta comprometi pa (sigui) hiba un finansa saludabel y duradero na beneficio di e pueblo Arubano. Un finansa publico cu ta permiti pa Aruba paga su debenan y na mesun momento inverti den e pueblo pa sigui progresa y bira mas resiliente. Pa Aruba por tin un finansa publico robusto, stabiel y sostenibel.
Sinembargo forsa un consenso riba un Rijkswet cu tin un impacto grandi riba nos autonomia financiero y pone como condicion cu si e Rijkswet no worde acepta lo pone un interes mas halto riba e pago di fianza, no lo yuda Aruba pa asumi su responsabilidad. E decision aki lo hinca nos mas profundo den e abismo di debe nacional y lo fomenta y sigui cultiva dependencia di Aruba na Hulanda. Esaki simplemente no ta sano ni posibel mas den siglo 21.
Cu den pasado nos a hiba un maneho financiero deficiente ta un echo y Aruba ta consciente di esaki. P’esey pueblo a sa di vota otro na december 2024 y a manda un mensahe cla y raspa caminda e dos partidonan cu a goberna tur tempo a bay atras den voto.
Cu e conscientisacion aki, formando un Frente Nacional entre politiconan y gremionan nos por mustra Hulanda e disciplina, determinacion, madurez y compromiso cu Aruba tin pa su pueblo y hiba un finansa responsabel manteniendo e normanan presupuestario den e LAft. Tambe ta hopi importante pa sa cu Reino Hulandes, pa medio di Statuut voor het Koninkrijk der Nederlanden, tin instrumentonan pa tuma un decision si nos no ta tene nos mes na palabracionnan haci of areglonan cera cu Reino Hulandes.
Pues sin un Rijkswet, Reino Hulandes ya caba por actua si mira cu cosnan no ta bay bon.
PPA a bay campaña cu e Plan Nos Aruba 2025-2050 y pueblo a duna nos sosten cu un asiento den parlamento. PPA den e Plan Nos aruba 2025-2050 ta boga pa mantene e normanan presupuestario den LAft sin tin cu bay over den un RAft. Den e plan aki PPA a elabora specificamente con Aruba ta bay garantisa un finansa responsabel.
Si Hulanda ta desea pa fomenta y stimula igualdad den Reino Hulandes, nos mester ta dispuesto pa confia otro y mas ainda empodera nos. Cu un Frente Nacional representando mayoria sector na Aruba, pueblo Arubano y pueblo Hulandes por ta convenci cu nos lo logra metanan comun na beneficio di nos pueblo. Uni den un Frente Nacional so nos lo vence y dividi nos lo cay.
