Lider di PPA:
ORANJESTAD (AAN): Lider di partido PPA y Parlamentario Otmar Oduber no ta mucho contento cu e aumento di prijs di gas cu a wordo anuncia pa minister di Economia.
Den un reaccion na prensa el a bisa cu e aumento sorprendente aki ta mustra cu gobernantenan, en todo caso minister di Economia, Geoffrey Wever, no tabata sincero cu e pueblo aki.
“Un persona cu ta fungi como minister di Economia, dos luna pasa ora cu tabata tin eleccion no a notifica pueblo cu lo bay bin un aumento den e prijs di gas”.
Bo tabata sa caba na e momentonan ey cu nos ta papiando di un aumento di riba 40%, pasobra e realidad ta cu kier a aumenta e prijs cu mas cu 45%, pero a scoge pa aument'e cu 35% na e momentonan aki.
Esaki segun Oduber, kende pa puntra su mes con Wever por tuma un pueblo haci, mirando cu tur partido incluyendo e partido nobo di Wever a indica cu costo di bida ta hopi halto na Aruba.
“Den henter e discusion ey y durante debate cu bo a representa bo partido, bo no a bisa cu tin mas medida na caminda y awor bo ta implementa un aumento di 35% riba e prijs di gas”.
Esaki ta nifica cu riba e consumo principal di pueblo cu ta cuminda, awor ta bin un aumento di 35%.
Esaki ta algo inaceptable y ta pone hende pensa con serio bo ta como politico, pa a manipula un pueblo di e forma aki y awor bo ta purbando di forma un gobierno, segun e lider di PPA.
