Parlamentario di AVP, Otami Thomasia:
ORANJESTAD (AAN): Modernisa Korrektie Instituut Aruba (KIA) no por limita su mes na construccion di un edificio nobo. Segun parlamentario di AVP, Otami Thomasia, e fortaleza berdadero di un instituto coreccional ta cuminsa cu e personanan cu diariamente ta carga cu e responsabilidad di mantene ordo, siguridad y contribui na rehabilitacion di personanan priva di libertad.
“Cada dia, e homber y muhenan di KIA ta drenta un di e ambientenan di trabou mas exigente na Aruba. Nan ta proteha nos comunidad den circunstancianan cu hopi biaha ta exigi fisicamente y mentalmente. Nan merece nos respet, pero respet mester wordo mustra cu accion,” Thomasia a expresa durante e debate parlamentario tocante KIA.
Segun e parlamentario, oficialnan coreccional no por sigui enfrenta exceso di overtime, escasez di personal, presion mental y un ambiente laboral dificil sin cu esaki eventualmente afecta e calidad di e sistema coreccional.
“Esaki no ta un critica riba e empleadonan di KIA. Al contrario. Ta un yamada pa sostene nan. Ora e personal no ta sinti nan mes sigur, motiva ni aprecia, henter e instituto ta sinti e consecuencianan.”
Thomasia a enfatisa cu un instituto coreccional moderno ta pidi hopi mas cu infrastructura nobo. Segun dje, liderazgo efectivo, maneho moderno di recurso humano, bon comunicacion, cuido pa bienestar di personal y un cultura organizacional saludabel ta mes importante.
“Un bon director no ta administra solamente un edificio; un bon director ta desaroya hende. Liderazgo ta nifica preveni burn-out, fortalece colaboracion, resolve conflictonan y crea un ambiente unda empleadonan ta sinti orguyo di nan profesion.”
E parlamentario a reconoce e rol importante di Departamento di Recurso Humano (DRH), pero a señala cu e realidad di KIA ta unico y p’esey ta pidi un acercamento adapta na e exigencianan di un instituto coreccional. Segun Thomasia, solucionnan lo tin mas efecto ora DRH, e ministerio, e direccion di KIA y e propio empleadonan traha hunto pa identifica e necesidadnan real di e instituto.
Thomasia a resalta cu bienestar di e personal y bienestar di personanan priva di libertad no por wordo mira como dos asunto separa.
“Oficialnan cu ta sinti nan mes sosteni ta por tuma miho decision bou di presion, reacciona cu mas profesionalismo den situacionnan di crisis y contribui cu mas efectividad na rehabilitacion. Esaki finalmente ta beneficia henter nos comunidad.”
Ademas di inversion den e personal, Thomasia ta di opinion cu rehabilitacion mester ocupa un lugar central den e vision pa futuro di KIA. El a indica cu educacion, capacitacion laboral, deporte, arte, apoyo psicologico, tratamento pa adiccion y orientacion social no ta premio pa e detenidonan, sino inversionnan den siguridad publico.
“E condicionnan di detencion ta forma parti di e condena, pero castigo so no ta suficiente. Si nos kier reduci reincidencia, nos mester crea oportunidad pa personanan cambia nan bida y reintegra den sociedad cu mas responsabilidad.”
Thomasia a adverti contra un sistema cu por deteriora dignidad humano y elimina speransa.
“Nos no kier un ambiente unda tanto e personal como e detenidonan perde nan dignidad. Nos mester un sistema unda disciplina y rehabilitacion ta bay man den man, cu liderazgo cu inspira confianza y cu tur esfuerzo ta enfoca riba un solo meta: un Aruba mas sigur.”
E parlamentario a conclui cu e futuro di KIA lo wordo determina no solamente door di concreto y staal, sino principalmente door di e inversion cu Aruba ta haci den su liderato y den e homber y muhernan cu diariamente ta mantene nos sistema coreccional funcionando.
“Ora nos fortalece nos oficialnan, nos fortalece nos sistema coreccional. Ora nos fortalece nos sistema coreccional, nos fortalece rehabilitacion. Y ora rehabilitacion ta logra resultado, Aruba henter ta bira mas sigur.”
