Parlamentario Edgard Vrolijk, fraccion di MEP:
ORANJESTAD (AAN) -- E di dos punto cu Parlamentario mr. Edgard Vrolijk a trece dilanti den conferencia di prensa di fraccion di MEP, ta un rapport cu, recientemente, a wordo publica y cu yama “De Schaduwkant van Aruba” (E Cara Scur di Aruba). E parlamentario a señala cu esaki ta un rapport cu ta mustra e realidad di e scogencianan politico.
“Pasobra hopi aña nan ta tuma nos na malo, ora cu nos ta bisa nan cu ‘e clinkers’ ey no ta mehora e calidad di bida. Awe, den un rapport yama “De Schaduwkant van Aruba”, ta indica nos con barionan cu tin e miho infrastructura, barionan cu tur siman nos por wak señor Eman ta verf den nan, ta e barionan cu mas tin problemanan social” segun e Parlamentario di MEP.
Acerca el a expresa cu ta facil y logico cu na momento cu el a dicidi fia cantidad di placa pa haci inversionnan, pa haci tur e locuranan cu e kier haci, na final di dia, y señor Eman tambe a bisa esey, ‘nos hunto tin cu bay pag’e y cu orguyo’. “Y ora cu bo ta bay paga e debenan aki cu orguyo, y cu orguyo, tin ta crea consecuencianan pa cu esaki; bo sa cu tin cu bay paga hopi mas interes; y ken ta bay pag’e? Ta pueblo tin cu bay pag’e!”, Parlamentario Edgard Vrolijk a subraya. E consecuencia ta bin riba costo di bida cu a aumenta drasticamente, hopi hende ta haci wega of no, esaki a conduci cu mayornan tin cu haci diferente trabao, tata cu mama tin cu traha dos te hasta tres trabao cu tur consecuencia familiar tambe. Tin biaha esaki ta termina den divorcionan, nos ta walk hopi mama hoben y tambe den edad un tiki mas avanza, cu tambe tin cu traha dos of tres trabao, p’asina ey por sobrebibi y tambe esey ta haci cu nan yiunan ta keda nan so”, Parlamentario Vrolijk a relata.
El a agrega cu den mesun barionan cu nos ta wak cu verf bunita, cu tur siman ta wordo geverf pero tras di muraya ta biba un realidad: “E ta yama De Schaduwkant van Aruba cu kiermen cu tras di muraya tambe ta biba un realidad na Aruba, unda cu e problemanan social aki a crece enormemente, unda cu mayornan no tin e tempo pa wak pa nan yiu nan placa cu nan ta hiba cas practicamente pa djis sobrebibi, den un pais cu a bira hopi caro, y practicamente no tin inversionnan social den bario, ni na scolnan”, e parlamentario a remarca.
