Parlamentario Evelyn Wever-Croes cu su opinion personal:
ORANJESTAD (AAN): Parlamentario Evelyn Wever-Croes cu hopi asombro a tuma nota di e decision di e gobierno Eman-Croes pa nombra Gerald Rasmijn den un funcion di confianza. El a expresa cu como ex-minister, y como un hende muher, cu hunto cu stakeholdernan local e internacional, a traha duro durante ultimo añanan pa fortalece e posicion di muhe na Aruba, e ta considera e nombramento aki repudiable.
Laga nos ta hopi cla: E nombramento aki ta mas cu un nombramento politico. E ta un mensahe pa nos sociedad cu sexismo y humiliacion publico di hende muhe no solamente ta wordo tolera, sino ta wordo recompensa pa e gobierno di Mike Eman y Gerlien Croes. Gerald Rasmijn a uza su pagina di Facebook “Pa Tin Pret” pa burla na forma hopi mahos di e ministernan femenino di Gabinete Wever-Croes, incluso trahando y repartiendo videonan pornografico falsifica, pa ridiculisa nan.
“Pensa un rato, si tabata bo Mama, bo pareha, of bo yiu muhe. Con bo lo a sinti? Ki mensahe esaki ta manda pa tur hende muhe y mucha muhe na Aruba, cu ta soña pa ocupa un rol di lider? Of na e hende muhe cu dia tras dia ta combati sexismo y intimidacion sexual riba medionan social?
E mensahe cu e nombramento aki ta duna, ta cu e dignidad di e hende muhe ta menos importante cu fabor politico. Tur e esfuerso cu nos a haci durante ultimo añanan pa promove derecho y igualdad di hende muhe, ta wordo benta afo den un solo golpi. Gobierno Eman-Croes ta manda un mensahe peligroso: cu hende muhe cu tin curashi pa expresa un opinion critico, mag di wordo humilia publicamente sin consecuencia!
Pesey mi a haci preguntanan na minister-president di Aruba, sr. Eman, y mi a haci un yamado pa e como cabes di e gobierno, duna claridad con e nombramento aki por a tuma luga. Si e tabata sa di e pasado di e persona aki. Y si e no tabata sa, si e ta dispuesto pa revoca e decision aki, pa respet pa tur hende muhe na Aruba. Mi a dirigi preguntanan similar na e ministernan femenino di Gabinete Eman-Croes, sra. Croes y sra. Wyat-Ras.
Aki no ta trata solamente di un persona, sino di ken nos ta como pueblo y con nos ta trata hende muhe cu tin bos. Respet no ta un luho; e ta un fundamento riba cual nos kier sigui lanta nos yiu muhenan, y construi nos pais” Parlamentario Wever-Croes a expresa.
