Parlamentario Evelyn Wever-Croes
ORANJESTAD – Basa riba e ultimo desaroyonan andando cu e gobierno nobo di AVP/Futuro, Parlamentario Evelyn Wever-Croes ta elabora riba e topico di “vakminister”. Esaki sigur ta su opinion personal pero ta haya importante si pa comparti esaki cu pueblo.
Parlamentario Wever-Croes su opinion personal ta;
1) un lider politico por nombra un “vakminister” ora riba su lista politico no tin ningun politico activo cu ta prepara of capacita pa ocupa e funcion, y/of cu no tin e conocemento ni experiencia necesario pa atende e retonan di e cartera.
2) e lider politico tin un otro persona di su confiansa, cu no ta un politico activo, pero cu tin e conocemento y experiencia riba e tereno di e ministerio specifico - infrastructura, energia y comunicacion - pa ehecuta e vision, y e experiencia necesario pa goberna.
“Den pasado ya nos a yega di mira carteranan manera finansas, economia y husticia wordo ocupa pa “vakministers”. Den e caso aki, y cu tur respet pa sr. Rene “Baba” Herde, e ta un pensionado cu talbes hopi experticio y experiencia riba tereno di enseñansa, pero no riba tereno di infrastructura, energia of comunicacion. E lo mester bay siña esey awor, ‘on the job’, mescos cu Minister Wendrick Cecilia. P’esey ora mi a scucha parlamentarionan di Futuro y AVP bisa cu sr. Herde ta e unico persona capacita y cu experiencia pa ocupa e puesto aki, mi a realisa mesora cu aki un hende ta tuma nan haci.
Mas aun, ora mi a scucha nan bisa cu esaki ta un areglo temporario, “wardando” riba sr. De Meza, esey a confirma mi prome pensamento cu un hende ta tuma nan haci, pasobra riba kico exactamente nan ta wardando? Nan ta bay sigui forsa sr. De Meza pa cuminsa mas caso? Nan no a realisa ainda cu cada caso cu nan a forsa sr. De Meza entama, ta mas problema el a haya su mes den dje?
Y ora mi a tende nan bisa cu tras di cortina di sr. Rene “Baba” Herde, ta parlamentario Mike de Meza mes lo ‘call the shots’, mi a realisa cu hendenan mes ta gusta pa nan wordo gaña. Mi a skirbi caba riba e violacion cu esaki ta di nos Trias Politica. Bo no por ta Parlamentario, cu mester controla gobierno, y mes momento bo ta esun cu ta ‘call the shots’ - pues goberna- tras di cortina.
Como un lider politico, mi ta considera e nombracion di sr. Herde, como un ‘slap in the face’ pa e politiconan activo riba e lista, specialmente pa e hobennan cu a campaña duro pa e partido gana eleccion bou e promesa di 'rehubenece' e partido. En todo caso, nos a mira un ‘novum’ atrobe den politica di Aruba” Parlamentario Wever-Croes a expresa.
