Parlamentario Marco Berlis (MEP):
*Politico di 27 aña ta keda hunga un politica dinosaurio
ORANJESTAD (AAN): Recientemente por a scucha e desesperacion di Marisol Tromp, cu un biaha mas ta fabricando storianan negativo riba e maneho financiero responsabel di Minister Xiomara Maduro. Marisol Tromp intencionalmente ta ignora informacion ricibi di Contraloria General (ARA), cu tabata recientemente den Parlamento. Ta pesey e ta importante pa mi presenta e hechonan y realidad pa pueblo compronde e politica barata cu Marisol ta hungando.
Contraloria General (ARA) a splica Parlamento tardansa di su rapport riba jaarrekening 2019
ARA tabata presente 25 di april 2024 den Parlamento y a informa y splica pakico lo tarda pa traha riba e jaarrekening 2019, cual a wordo entrega na ARA pa minister Xiomara Maduro dia 23 di november 2023. Den e splicacion di ARA, nan a pone hopi enfasis riba nan motibonan y cu esakinan ta hacie dificil pa nan por haci dos investigacion pareu.
Mirando ARA a comparti tur informacion den detaye cu Parlamento den un “Besloten Bijeenkomst,” ta faprante cu awor Marisol Tromp ta sali grita cu tardansa di jaarrekening 2019 ta e falta di Minister Xiomara Maduro. Marisol atrobe hungando un Politica Dinosaurio?
CAft y IMF tin comprension pa e falta di profesionalnan den e departamento di finansas
CAft den su diferente rapportnan a cubri e tema di atraso di jaarekening. Pesey CAft a aproba un presupuesto pa e departamento di finansas por contrata mas profesional cu lo por yuda procesa y traha e jaarrekeningnan na tempo.
Notabel ta cu den e ultimo rapport di CAft di 10 di juni 2024 riba e uitvoeringsrapportage (UR) di cuater kwartaal di 2023, ta elogia Minister su maneho financiero y cu gobierno a cumpli cu tur norma acorda. E unico critica tabata riba e tardansa di e UR, riba cual contesta di Minister Maduro a splica cu a contrata un profesional y cu esaki lo bay yudanan completa rapportnan na tempo.
Minister di Finansas y su profesionalnan ta demostrando curashi y determinacion pa cumpli cabalmente y esaki ta keda refleha a traves di elogio, aprobacion di instancianan halto y upgrading di e rating di Aruba. Pakico anto tanto critica di Marisol contra minister Maduro? Politica Dinosaurio?
Marisol a sostene e deficitnan historico, Megadebe, KB y CAft
Historia ta demostra evidencia contundente cu Marisol como Presidente di Parlamento durante e gobierno di Gabinete Mike Eman, a vota “pro” deficitnan historico cu a causa e megadebe catastrofico di nos pais. Ademas Marisol su inaccion contra e maneho devastador aki a causa e ex minister di Finansas di partido berde pa haya un KB! Dia cu Marisol mester a denuncia maneho catastrofico di su minister di Finansas di partido berde, e la grita “pro” y nunca a presenta un mocion di desconfiansa contra dje pa kit’e di trabao! Awe cu presupuestonan ta entrega na tempo, ta cumpli cu tur normanan, tin surplus pa paga e debe cu MARISOL a aproba, e kier sigui hunga un politica Dinosaurio?
ARA probablemente lo keda cla cu su control di e jaarrekening 2019 na october 2024 y sigur lo sa di duna comentario como organo independiente riba e maneho di finansas publico di gobierno di Aruba.
