Parlamentario Rycond Santos Do Nascimento:
ORANJESTAD (AAN) – Parlamentario Independiente, Rycond Santos-Do Nascimento, kier a trece na atencion di pueblo, pa medio di un entrevista cu DIARIO, e situacion di pobreza cu tin den pueblo.
E parlamentario a bisa cu hopi politico ta papia di dje, y e ta haya e impresion cu hopi hende ta haci manera cu no tin pobreza na Aruba.
“E realidad ta cu hopi hende ta pasa den necesidad. E ora ey mester analiza kico ta e necesidad. Y nos por pasa asina, di partido pa partido wak kico cada partido bisa. Por ehemplo, señor Mike Eman ta papia di mitad di nos poblacion of mitad di nos forza laboral ta biba cu menos di e mitad di bestaansminimun cu ta mas of menos 2600 florin, anto bo ta wak cuanto hende ta biba di un salario minimo. E otro grupo grandi ta esun cu ta pensionado. Nos sa cu e pensioen di behez (AOV) ta 70% di un salario minimo, kiermen si salario minimo ta na 2 mil florin awo, anto bo tin mas of menos 1300 florin na pensioen di behez, solamente. E pregunta ta: esakinan ta e gruponan di pobreza den nos comunidad? Tin otro grupo cu nos no ta papiando di dje, cu ta e mamanan soltero; tambe tin e personanan cu ta biba di bijstand, y esaki tur ta conoci pa nos. Cu tin necesidad. Pero locual nos no ta analiza ta: ‘Kico ta pobreza’!” asina Parlamentario Santos Do Nascimento a remarca.
El a sigui bisa cu hende ta haci comosifuera cu pobreza solamente ta falta di entrada. El a reitera cu bestaansminimun ta un manera pa midi entrada; ora e ta papia di salario minimo, ta un manera di midi entrada; tambe por mira e “poverty line’ cu tambe ta un manera di midi entrada. “Pero pobreza ta hopi mas cu solamente entrada. Pasobra si bo ta wak e cuestion di mama soltero den e pais aki, ora cu e tin un salario ta bay banco e no ta haya mesun trato cu un hende homber. E posibilidad pa haya acceso na financiamento ta menos pa e mama soltero ey. Anto nos ta wak cu pobreza tambe ta cuestion di acceso na financiamento”, e Parlamentario a argumenta.
