Parlamentario Jennifer Arends-Reyes:
ORANJESTAD (AAN): Durante e reunion publico tocante e contract entre Aruba Tourism Authority (ATA) y un compania priva pa maneho di desperdicio, Parlamentario Jennifer Arends-Reyes a expresa su sosten pa iniciativanan cu ta contribui na un Aruba mas limpi, sostenibel y bon prepara pa futuro. E parlamentario tambe ta presidente di comision di turismo den Parlamento di Aruba.
Segun Arends-Reyes, e problema di desperdicio y dump ilegal ta un reto cu Aruba ta confrontando pa hopi aña. P'esey, segun sra Arends-Reyes, no ta suficiente pa reconoce e problema; mester crea facilidadnan practico cu permiti ciudadano dispone di desperdicio grandi na un manera responsabel.
“Tur hende kier un Aruba limpi, pero pa logra esaki mester tin decision, inversion y facilidadnan cu ciudadano realmente por usa,” el a declara. Arends-Reyes a indica cu cooperacion entre Gobierno, ATA y sector priva por representa un paso importante den direccion di un maneho di desperdicio mas eficiente. Segun e parlamentario di AVP, gobierno mester sigui establece reglanan, supervisa calidad di servicio y proteha interes publico, mientras cu sector priva por aporta conocemento tecnico, capacidad y infrastructura pa logra miho resultado.
E parlamentario a señala cu un centro organisa pa entrega desperdicio por yuda reduci dump ilegal y mehora e apariencia di Aruba, loke ta beneficia tanto comunidad como turismo.
“Turismo ta e motor principal di nos economia. Un isla limpi ta parti esencial di nos producto turistico. Nos no por promove Aruba como ‘One Happy Island’ sin sigui inverti den limpieza, ordo y sostenibilidad.”
Segun Arends-Reyes, turismo moderno no ta limita na promocion internacional, sino tambe na maneho di destino: inverti den calidad di e destinacion mes, incluyendo limpieza, medio ambiente, siguridad y experiencia di bishitantenan. Un turista no ta keda solamente den hotel, sino e ta uza nos camindanan, bishita nos playanan, naturaleza y barionan. P'esey, inversion den limpieza ta un inversion directo den futuro di nos producto turistico.
Arends-Reyes a expresa cu participacion di ATA den proyectonan di limpieza ta na su luga, tanten cu e ta haci den cuadro legal y financiero. Segun e parlamentario, loke ta bon pa comunidad tambe ta bon pa turismo, y un sector turistico fuerte ta contribui directamente na empleo y stabilidad economico di miles di famia Arubiano.
Durante e reunion, e parlamentario a aprecia cu Minister di Turismo Wendrick Cicilia a presenta informacion na Parlamento y a asumi responsabilidad politico pa splica e proceso. Na mes momento, el a solicita mas claridad tocante con e servicio lo funciona den practica, cua tipo di desperdicio ciudadano por entrega, con lo supervisa e calidad di servicio y con e proyecto ta conecta cu e plan nacional pa reciclahe, reduccion di dump ilegal y maneho di desperdicio.
“No mester mira e contract aki como un accion aisla. E mester forma parti di un strategia integral pa limpieza y sostenibilidad di Aruba.”
Arends-Reyes a enfatisa cu control parlamentario no kiermen opone automaticamente cada iniciativa, sino evalua si e ta ehecuta cu transparencia, bon administracion y dunament’i cuenta. Tambe e ta encurasha gobierno y ATA pa informa comunidad regularmente tocante e resultadonan di e proyecto y fortalece control contra dump ilegal.
Finalmente, e parlamentario a haci un apelacion na comunidad pa haci uzo responsabel di e facilidadnan cu a crea. “No por acusa gobierno di falta di limpieza mientras cu tin persona cu ta sigui benta desperdicio den mondi of cant’i caminda. Gobierno mester crea facilidad y ehecuta control, pero ciudadano tambe tin su responsabilidad.”
Pa conclui, Arends-Reyes a reafirma su apoyo pa iniciativanan cu ta fortalece maneho di desperdicio y proteha Aruba como un destinacion turistico di calidad. “Un Aruba limpi ta bon pa nos pueblo, bon pa nos economia y bon pa turismo. Pero, mas cu tur cos, un Aruba limpi ta responsabilidad di nos tur.”
