Segun Parlamentario Evelyn Wever-Croes:
ORANJESTAD (AAN): “Presidente di Parlamento Marlon Sneek no ta tuma su trabao na serio. Mas bien e ta hopi ocupa cu ‘window dressing’, drechando den e edificio di Parlamento, poniendo luz cu ta cende paga y cambia di color manera ta den nightclub mientras cu Parlamentarionan ta dunando disertacion. Riba e cosnan aki, e presidente ta pone atencion, riba loke hende por mira, pero riba e parti constitucional di nos Parlamento, lamentablemente e ta fayando”, asina Parlamentario Evelyn Wever-Croes a expresa durante conferencia di prensa di Fraccion di MEP dialuna mainta.
Segun Parlamentario Wever-Croes, durante e aña y mei cu a pasa, Fraccion di MEP a pidi 41 reunion. E presidente a yama 11 reunion solamente y 30 reunion e no a yama. Segun e, e 11 reunionnan cu a ser yama, varios a cuminsa y a keda te na e prome tanda y nunca mas e presidente a continua cu nan.
E contesta cu Fraccion di MEP ta haya ora cu nan a puntra e presidente di Parlamento di con e no ta yama of sigui cu e reunionnan, primeramente, ta cu e ministernan no kier bay reunion.
“Den un reunion di comision di asuntonan domestico di Parlamento, hunto cu lidernan di fraccion y Presidente di Parlamento, mi a bisa e presidente di Parlamento cu e no por contesta cu e ministernan no kier bay reunionnan. Ministernan no tin e opcion ey”, Parlamentario Wever-Croes a enfatisa.
Segun Wever-Croes, ta e presidente di Parlamento mester pone e ministernan na haltura cu a drenta un peticion pa un reunion. Ley ta prescribi cu den trinta dia e minister mester presenta na e reunion.
“Esaki ta trinta opcion cu e ministernan tin, di dia un pa dia trinta y e por tin e opcion pa kies cua di e trinta dianan ey ta miho pe. Pero e ministernan no tin opcion pa bisa e Presidente di Parlamento cu nan no kier of no lo asisti na reunionnan”, Parlamentario Wever-Croes a enfatisa.
