Ultimo rapport di CAft ta bari Miguel Mansur su argumentonan

Parlamentario Marco Berlis (MEP):

*CAft ta raporta cu Gobierno su gastonan ta na nivelnan apropia y ta elogia maneho 

ORANJESTAD (AAN):  For di algun tempo caba Miguel Mansur ta keda tilda cu Gobierno no ta bahando gasto, cu gastonan ta keda halto, pero sigur no ta mustra documento riba cifranan di presupuesto di 2022 y 2023 cu ta asina.

            CAft keto bay ta supervisa y monitoria e parti financiero di Gobierno di Aruba y a saca un rapport dia 28 di april 2023 riba e di cuater Uitvoeringsrapportage di 2022. Pasando riba e rapport aki tur hende por a wak cu CAft a cubri varios punto importante riba e maneho di Gobierno riba cual e la duna su comentario. Esaki ta un rapport cu Mansur ta muisstil riba dje y ta prefera pa lag’e den lachi.

            No ta nada straño ya cu Mansur no tin mucho pa gara riba dje y awor mester keda trata na sembra confusion, pasobra e rapport di IMF, EBA y CAft cu ta elogia e trabao financiero di Gobierno y e progreso di nos economia tin Mansur man na cabes. 

CAft ta elogia Gobierno su maneho financiero

• Pais Aruba ta cumpli ampliamente dentro di e cuadro di e maximo di “financieringstekort” cua a wordo dicidi pa Rijksministerraad (RMR) cu por a yega 131 miyon florin.
• E schuldquota di pais Aruba ta awor na 88% di nos GDP! E debe a baha cu 13% compara cu esun di 2021. Esaki a wordo causa door di e crecimento fuerte di nos BBP. 

CAft ta raporta cu personeelskosten a keda na un nivel apropia na 2022

• CAft ta reporta cu pais Aruba su gastonan personal “personeelskosten” pa 2022 tabata 426 miyon florin. Cu e suma aki Aruba ta cumpli cabalmente cu e personeelslastennorm di 2022.
• CAft ta reporta cu Gobierno ta tumando pasonan pa maneha e personeelslasten structuralmente. 

CAft ta raporta cu e post ‘Goederen en Diensten’ a baha drasticamente

• CAft ta bisa den su rapport cu: “er is een flinke onderbesteding ten opzichte van de BW.” Den otro palabra CAft den su rapport ta bisa cu ‘Goederen en Diensten’ a baha drasticamente na 2022 cu 14%!
• CAf ta informa den e mesun paragraaf riba pagina 5 di e rapport cu entre 2018-2022 tabata tin un bahada di 8% promedio riba e post ‘Goederen en Diensten’! Esaki ta pa pueblo wak y compronde con deceptivo AVP, oposicion y algun gremionan ta cu a bin ta grita cu Gobierno ta insisti pa no baha gasto! 

CAf ta raporta cu Gobierno por logra baha e debe te na 70% di GDP pa 2027

• CAft su analisis ta mustra cu Gobierno lo por logra baha e debe di pais Aruba te cu 70% si e economia keda mesun resiliente y Gobierno keda mantene su gastonan abao manera e la bin ta haci caba. 

            Riba e ultimo pagina CAft ta urgi gobierno pa finalisa e jaarrekening di 2019 bay ariba, pero alabes ta scucha Gobierno su retonan pa por cumpli cu esakinan. Mesora CAft ta brinda gobierno e sosten y medionan tambe pa esaki por sucede.

            Gobierno su plan ta pa tin tur jaarrekening di nos pais na ordo pa 2024. Mirando cu semper coalicion di AVP, esta MAS, Accion21 y AVP a usa rapportnan di CAft pa ataca Gobierno, awor cu CAft su comentarionan y tono ta uno di elogio pa gobierno, nan tur ta muisstil.

            Mansur por grita y lanta stof cuanto cu e kier, pero Gobierno su trabao serio y disciplina awe ta conta cu un rapport di CAft, EBA, BCA y IMF cu ta comproba esaki. Acaso Mansur por desbarata e rapportnan aki?

            Aruba ta recuperando pa via di un maneho responsabel y surplus tur aña riba nos presupuesto. Un surplus tur aña ta un siguransa cu nos por sigui paga nos debenan structuralmente mientras Gobierno por sigui inverti den nos pais.