Analisis di Parlamentario Dennerich Kelly:
ORANJESTAD (AAN): E siman aki scolnan na Aruba ta habri nan portanan atrobe. Pa miles di mucha y hoben, esaki ta nifica cuminsamento di un aña escolar nobo: buki, maestro y retonan nobo y, pa algun, decisionnan importante tocante nan futuro. Pa mayornan tin preguntanan cu ta bay mas leu: Mi yiu ta haya bon enseñansa y guia? Cua direccion di estudio ta pas cu ne? Cua oportunidadnan lo tin p’e na Aruba? Y si e mester studia den exterior, con nos lo financia esaki?
Ta preguntanan cu ta bolbe tur aña. Pero como sociedad, kisas nos mester haci un pregunta mas frecuente: kico ta pasa despues cu nos hobennan gradua?
Aruba ta un isla chikito y nos no por ofrece tur estudio specialisa nos mes. P’esey, hopi hoben ta sali despues di scol secundario pa Hulanda, Merca of otro pais pa sigui studia. Nos por ta orguyoso di esaki. Mayornan, hobennan y Aruba ta inverti den nan educacion y desaroyo. Sinembargo, algun aña despues nos ta confronta escasez di personal cualifica y e dificultad pa logra cu profesionalnan bolbe Aruba.
Recientemente, den combersacion cu ex coleganan, docentenan y otro expertonan, e tema aki a surgi specialmente den sector di cuido. Un punto importante tabata salario atractivo pa profesionalnan Arubiano cu ta traha den exterior.
E discusion ta valido, tanto pa esnan cu ta afo como pa esnan cu a scoge di keda Aruba. Un dokter, nurse of otro profesional specialisa cu a construi mihor condicionnan laboral den exterior, naturalmente lo evalua e aspecto financiero ora e considera un regreso. Pero e storia no ta caba ey.
No ta djis comparacion di salario: Ora un persona considera bolbe Aruba despues di dies of diescinco aña den exterior, e no ta compara simplemente dos recibo di pago. E ta compara dos bida.
Tempo cu ami mes tabata evaluando pa bin Aruba bek, mi a considera perspectiva di carera, vivienda, desaroyo profesional, condicionnan laboral y calidad di bida. Aruba tin algo special cu ta dificil expresa den placa: famia, cultura, beach y e paz di cas. E sentimento cu bo por aporta na bo propio isla tambe ta conta, pero mester bay hunto cu un perspectiva realistico pa futuro.
P’esey nos mester amplia e discusion. No solamente pregunta di con nos profesionalnan no ta bolbe, sino tambe con nos a organiza e trayecto for di escogencia di estudio te cu un posibel regreso.
Cu rason nos ta dedica hopi atencion na escogencia y financiamento di estudio. Pero nos tin un structura cla pa loke ta pasa cinco, dies of diescinco aña despues? E forma di fia y paga bek na Hulanda a cambia drasticamente. Na Aruba, nos ta prepara hoben y mayornan suficientemente pa comprende e impacto financiero riba nan futuro?
Nos hobennan sa cua profesionnan Aruba lo tin mester den algun aña? Durante nan estudio y prome añanan di trabao, nos ta mantene suficiente contacto cu nan? Nan conoce e oportunidadnan cu Aruba por ofrece si nan kier bolbe?
Gobierno y departamentonan ta bay Hulanda pa feria di empleo, algo cu ta di aplaudi. Pero nos mester evalua e resultado: con efectivo e esfuerzonan ta, kico mester adapta y con nos ta sigui cu nan den futuro?
Ta bon cu Aruba ta inverti den salida di nos hobennan pa bay studia. Pero nos ta inverti cu mesun conciencia den e posibilidad pa nan bolbe?
No ta responsabilidad di gobierno so: Gobierno tin un responsabilidad importante den enseñansa, financiamento di estudio, maneho di mercado laboral y creaccion di condicionnan basico. Pero e asunto no por keda exclusivamente den man di gobierno.
Dunadornan di trabao den cuido, enseñansa y sector empresarial tambe mester pensa tocante kico nan por ofrece profesionalnan. Tin biaha esaki lo exigi mihor salario. Pero por trata tambe di condicionnan laboral creativo, orario flexibel, posibilidad pa sigui studia of specialisa, un ruta cla pa desaroyo di carera y sosten durante e proceso di regreso.
No tur grupo profesional tin mester di e mesun solucion. Loke un specialista medico tin mester no necesariamente ta mescos cu loke un maestro, ingeniero, specialista di ICT of nurse tin mester. Precisamente p’esey, Aruba mester crea un vision comparti cu no ta carga di gobierno of un sector so.
Di escogencia di estudio pa escogencia di futuro: Ora miles di mucha drenta klas atrobe, nos ainda no sa ken lo bira dokter, maestro, ingeniero, nurse, empresario, hurista of specialista di ICT. Pero un cos nos sa sigur: Aruba lo tin mester di nan.
P’esey, maneho di enseñansa no por trata solamente di cuanto hoben nos ta logra gradua. Y maneho di mercado laboral no por cuminsa solamente ora un sector ta enfrenta escasez. Mester tin conexion entre loke nos ta siña nos hobennan, cua conocemento Aruba lo tin mester den futuro y cua perspectiva nos por ofrece nan despues.
Esaki no ta nifica cu tur studiante Arubiano ta obliga pa bolbe. Hobennan ta liber pa scoge nan propio futuro, y experiencia internacional por tin un balor enorme. Nos responsabilidad ta percura pa Aruba tambe por ta un escogencia atractivo.
E pregunta nos dilanti: Ora nos yiunan sali pa bay studia, nos ta spera cu nan lo bolbe cu conocemento, experiencia y ambicion. Pa logra esaki, nos tin mester di mas cu un salario atractivo. Nos mester un isla caminda enseñansa, oportunidadnan di carera, vivienda pagabel, desaroyo profesional y perspectiva pa futuro ta bin hunto den un vision duradero.
P’esey, e pregunta no ta solamente di con nos profesionalnan ta keda afo. E pregunta mas importante ta: kico nos mester haci awe pa percura cu mañan Aruba ta un lugar caminda nan ta desea di bolbe?
Y despues tin un reto ainda mas grandi: si nos, como pais, ta logra transforma e vision ey den accion y ehecuta nos plannan di un forma duradero.
