Parlamentario Evelyn Wever-Croes na Minister Gerlien Croes:
ORANJESTAD (AAN): E siman aki, Minister Gerlien Croes a publica riba su Facebook cu un di e motibonan pa cua e ta pro HOFA ta e 14 miyon florin cu a bay na Stichting FUTURA durante e gobernacion anterior. Segun e, desde januari 2026 el a pidi responsabilisacion di e placa di pueblo aki y ainda e ta wardando riba contesta di e ex Prome Minister Evelyn Wever-Croes. Den poco palabra, e ta reta e ex mandatario pa duna contesta di esaki despues cu e bin di vakantie.
Na su banda, e ex Prome Minister Wever-Croes, actual Parlamentario di MEP, a contesta Minister Gerlien Croes durante su vakantie mes, sin mester warda te ora e yega bek Aruba di un vakantie bon mereci, bisando cu si ta asina e minister actual ta prefera di comunica, e lo duna contesta tambe riba Facebook pa asina e mensahe por yega tambe na e minister di Gabinete AVP Futuro.
E Parlamentario, na prome luga, a pidi pa Minister Croes haci su trabou prome cu e purba tira lodo. El a enfatisa den su post riba Facebook, cu cada aña durante su gobernacion, el a duna cuenta di su ministerio detayadamente, incluso di FUTURA, y tur e relatonan anual aki desde su prome aña di gobernacion te ultimo aña di su gobernacion ta publica online y cada parlamentario di e temporada ey, incluso Gerlien Croes, a haya un copia.
Ademas, Parlamentario Wever-Croes a indica cu durante traspaso di gobiernacion na AVP Futuro, el a entrega actual Prome Minister Mike Eman tur cuenta anual di cada aña di su ministerio y ta reta Minister Gerlien Croes pa haci un bishita na oficina di Prome Minister Eman pa haya su contesta un biaha mas y no warda mas.
“Subi dos piso den cocolishi y bo ta haya tur documento. Cu boso tin problema den coalicion no mester stroba bo. Pone bo ego un banda. No mester warda te despues di vakantie. Haci’e awe mes”, Parlamentario Wever-Croes a sugeri na Minister Gerlien Croes.
Ademas di esaki, e parlamentario ta recorda cu e minister en cuestion si tin cuenta pa duna ainda cu tampoco mester warda te despues di vakantie pa duna contesta.
“Awor un pregunta pa e minister contesta: ki dia abo ta duna e pruebanan di bo biahe den jet priva, y e conseho di LAR? The clock is ticking. You can run, you can hide, but the truth will always prevail. E bala ta bek den bo scochi, pueblo ta wardando y bo tempo ta casi caba!”, Wever-Croes a enfatisa.
