Record nobo den aña Parlamentario
ORANJESTAD (AAN): E relato anual di Parlamento ta duna un bista cla di e trabao realisa pa pueblo su representantenan durante e aña parlamentario cu a transcuri (september 2025 - september 2026).
E documento aki ta mustra e esfuersonan y e desempeñonan individual, unda por mira cuanto reunion a wordo yama, kendenan tabata activo, kendenan a pidi reunion y kendenan a haci pregunta pa controla gobierno.
E cifranan ta revela cu tabatin un total di 4,595 pregunta haci na e ministernan. Lamentablemente, un cantidad considerabel di 2,616 pregunta (un 57%) te cu awe ainda no a wordo contesta.
Sin embargo, loke a resulta mas sorprendente den e evaluacion ta e registro di e parlamentarionan Gino Goeloe (Partido Futuro) y Stephany Sevinger (Partido AVP), kendenan no a haci ni un solo pregunta por escrito den tur e 12 lunanan di trabao.
Esey ta loke Endy Croes di Partido MEP a tuma nota di dje.
E tarea primordial di un miembro di Parlamento ta dividi den dos pilar central: legisla y eherce un control severo riba Gobierno. Preguntanan por escrito ta entre e instrumentonan constitucional mas poderoso pa obliga Gobierno pa duna cuenta y pa garantisa transparencia den maneho publico. Ora un parlamentario keda sin uza e herment aki pa un aña largo, ta bira casi imposibel pa hustifica con el a cumpli cu su deber di control na fabor di Pueblo.
Representa pueblo ta exigi hopi mas cu participacion den debate of presencia riba medianan social; e ta rekeri investigacion profundo, preguntanan critico y un dedicacion structural na e interes general. Ta keda awor na e comunidad, como e hurado final, pa evalua e rendimento aki.
Pa e aña parlamentario cu a caba di cuminsa, e expectativa ta cu tur representante lo haci uzo di e hermentnan disponibel pa asina eherce un control real riba gobierno y evita pasa berguensa.
Na final di dia, e funcion di un Parlamentario no ta un privilegio sin responsabilidad, e ta un compromsio cu pueblo, y pueblo mes tin e ultimo palabra.
