Segun Parlamentario Evelyn Wever-Croes:
ORANJESTAD (AAN): Parlamentario di Fraccion MEP, Evelyn Wever-Croes, a reacciona riba e situacion actual rond di e sector UTV/ATV, despues cu Gobierno a cera camindanan na costa cu baranca. E decision a causa malcontento entre doñonan di negoshi cu ta opera e vehiculonan aki, kendenan a bay den welga pa expresa nan preocupacion.
Segun Wever-Croes, Gobierno actual ta purba pone responsabilidad pa e decision riba Gobierno anterior, bisando cu e plan tabata origina durante su gobernacion. E parlamentario a publica un grabacion di dia 14 augustus 2024 pa aclaria loke su Gobierno realmente tawata preparando.
Segun el a expresa den e grabacion di e fecha menciona, su gobierno di Gabinete Wever Croes, e tempo ey a papia di regula e sector di UTV/ATV, pa den dialogo crea balansa entre desaroyo y naturalesa.
El a expresa cu e sector UTV/ATV ta importante pa nos turismo, y naturalesa tambe mester wordo protehi. Sinembargo nunca a yega na cera caminda cu baranca.
“Nos a demostra liderazgo, nos a bay den dialogo buscando solucion hunto”, el a expresa.
E comision e tempo ey cu tawata encarga cu regulacion di e vehiculonan UTV y ATV, tabata trahando riba diferente proposicion pa mehora control riba e vehiculonan, siguridad den trafico, siguridad di peatonnan, registracion, exigencianan tecnico y proteccion di naturalesa. E gobierno e tempo ey tawata kier a regula e sector, pasobra e ta un desaroyo economico importante pa turismo, pero no den e forma cu e tabata operando e momento ey.
Sinembargo, Parlamentario Wever-Croes a enfatisa cu tres siman despues di e grabacion aki, Gobierno a cay. For di e momento ey Gabinete Wever-Croes a bira demisionario y no por a tuma ningun decision valido mas.
Regula mediante dialogo no ta mescos cu cera caminda unilateralmente. Por conclui di e publicacion di Parlamentario Wever-Croes cu, responsabilidad pa e decision actual ta cerca Gobierno actual, kende mester duna cuenta di su propio maneho y busca solucion den dialogo cu e sector.
