Parlamentario Evelyn Wever-Croes:
“E proyecto mes no ta e problema, sino e manera con e procedura a bay”
ORANJESTAD (AAN): Parlamentario Evelyn Wever-Croes a duna su opinion riba e contract entre Aruba Tourism Authority (ATA) y Ecotech pa habri un zona di desperdicio. Segun e, e proyecto mes no ta e problema, sino e manera cu e procedura a wordo maneha y anuncia.
Wever-Croes a indica cu Fraccion di MEP ta sostene e necesidad di un zona di desperdicio, mirando cu limpiesa di Aruba ta importante pa comunidad y pa turismo. “Nos no ta cuestionando e proyecto di zona di desperdicio. Nos ta cuestionando e proceso”, el a enfatisa.
E parlamentario a menciona cuatro punto cu, segun e, mester a wordo maneha diferente.
Na prome luga, e proyecto mester a cay bou di responsabilidad di Minister di Arthur Dowers, y no di Minister di Turismo, Wendrick Cicilia. Segun Wever-Croes, Cicilia tin suficiente reto den su propio cartera, entre otro den turismo y labor. El a señala cu tin preocupacion den comunidad tocante e tipo di turismo cu ta bishita Aruba, mientras cu trahadornan di Departamento di Labor tambe ta pidi mas atencion.
Na di dos luga, ATA no mester a financia ni firma directamente e contract. Wever-Croes a argumenta cu ATA no tin e experticio tecnico pa evalua oferta den e sector di desperdicio y cu su meta legal no ta permiti un interpretacion asina amplio. Segun e, ATA por a contribui pagando Gobierno un dividendo adicional di Afl. 2,2 miyon. Gobierno por a transferi e fondo na Minister Dowers, despues di cual e minister of Serlimar por a negocia y paga e proyecto.
Na di tres luga, e proyecto no mester a wordo otorga na Ecotech sin un destaho publico. Wever-Croes a referi na articulo 28 di ley di ATA, cu segun e ta exigi un procedura di destaho publico, tambe den situacionnan urgente. Pa e motibo ey, el a considera cu e proceso no a cumpli cu e exigencianan legal.
Na di cuatro luga, e presidente di Hunta di Directiva di ATA no mester a firma e purchase order, mirando cu e persona aki tambe tin un posicion halto den e compania cu a haya e proyecto. Aunke e persona no a participa den e negociacion pa evita conflicto di interes, Wever-Croes ta opina cu e mester a keda completamente afo di e proceso y laga su suplente firma.
Finalmente, e parlamentario a pidi Gobierno pa admiti si a comete eror y entrega tur informacion relevante, pa Parlamento por evalua kico ainda por wordo coregi. “Nos lo sigui e caso aki y spera di contribui na un forma positivo y constructivo na un miho gobernacion pa Aruba”, Wever-Croes a expresa.
