ORANJESTAD (AAN): E introduccion di e ley cu ta prohibi saco di plastic a contribui significativamente na proteccion di medio ambiente.
Sinembargo, segun Parlamentario di Fraccion di AVP Mike de Meza, ta necesario pa optimisa e legislacion existente y introduci medidanan adicional pa combati e problema di desperdicio y sushedad na Aruba.
De Meza ta propone pa introduci un sistema di ‘statiegeld’, combina cu un accijns adicional riba diferente tipo di material di empaketa (verpakkingsmaterial) cu ta wordo importa. Bou di e sistema aki, materialnan colecta den naturalesa of den espacio publico por wordo entrega y a base di nan peso, lo ricibi un compensacion financiero. Segun e parlamentario, botternan cu tin statiegeld dificilmente ta wordo benta zomaar tur caminda, compara cu otro tipo di botter of material di empaketa.
“Tin hopi pais cu ya ta aplica un sistema di statiegeld riba diferente tipo di material, entre otro carton, papel, plastic, bleki, wayanan di hero. Esaki por yuda Aruba tambe. Nos mester lucha pa logra e cambionan necesario den ley y introduci statiegeld riba tur material di empaketa,” De Meza a remarca.
Como ehempel, e parlamentario a menciona koper, un material cu dificilmente ta wordo benta riba caya, pasobra e tin un balor economico. Segun su opinion, un principio similar mester wordo aplica na material di empaketa cu ta drenta Aruba.
De Meza a indica cu generalmente personanan cu ta haci mas compra online y ta importa producto di exterior ta genera mas material di empaketa. Mediante un sistema di statiegeld, e consumidor cu ta importa e producto ta paga e deposito via accijns riba e materialnan aki, mientras cu e persona cu ta colecta y entrega e material por ricibi e compensacion corespondiente.
Segun De Meza, un sistema asina no solamente lo contribui na un Aruba mas limpi, sino tambe por crea oportunidad nobo di trabou y entrada pa personanan cu lo por dedica nan mes na coleccion y reciclahe di material.
“Statiegeld por bira un di e componentenan importante cu lo yuda soluciona gran parti di e problema di desperdicio na Aruba,” De Meza a conclui.
