Parlamentario Jennifer Arends-Reyes:
ORANJESTAD (AAN): E Comision di Turismo di Parlamento a bishita Aruba Airport Authority (AAA) pa conoce e progreso di Gateway 2030. Durante e encuentro, CEO y ehecutivonan di AAA a duna un presentacion tocante e proyecto, despues di cual e miembronan presente a haci un bishita na e sitio pa mira e trabaonan mas di cerca.
Jennifer Arends-Reyes, presidente di e Comision di Turismo, a destaca cu ta importante pa Parlamento sigui e desaroyonan aki y conoce e preparacionnan pa futuro di e aeropuerto.
“Un aeropuerto moderno y prepara pa futuro ta un parti importante di nos Infrastructura. E desaroyonan aki tin impacto riba nos conectividad, turismo y economia. P’esei, Parlamento mester sigui di cerca con e proyecto ta progresa,” Arends-Reyes a declara.
E presidente a expresa cu ningun representante di MEP y PPA no a participa den e bishita y tampoco a avisa cu nan no lo por a presenta.
“Despues cu MEP a pidi pa reuni urgentemente cu stakeholders di turismo, e stakeholder a aparta tempo y prepara pa e encuentro. Ta lamentable cu e representantenan cu a pidi cu urgencia pa reuni no a presenta ni a cancela nan ausencia. Tawatin amplio oportunidad pa haci pregunta tocante tur desaroyo riba e vision di AAA y Turismo di Aruba. Nos mester trata e dialogo cu seriedad y cu respet pa e tempo di tur hende,” Arends-Reyes a bisa.
Arends-Reyes a gradici AAA pa su presentacion y pa duna e Comision e oportunidad pa conoce e avance di Gateway 2030. E Comision lo sigui atento e desaroyonan den turismo y e Infrastructura cu ta importante pa Aruba.
https://diario.aw/categories/noticia/politica/ta-lamenta-ausencia-di-mep-y-ppa-na-bishita-di-comision-di-turismo-na-aaa-nv#sigProIdc44c2bf431