Otmar Oduber di Plataforma Nos Pais
ORANJESTAD (AAN): Otmar Oduber di Plataforma Nos Pais a elogia e iniciativa cu a tuma lugar siman pasa unda a realisa un foro pa adultonan mayor. Si e ta cuestiona e hecho cu a tarda 3 aña pa organiza e tipo di conferencia aki.
Plataforma Nos Pais for di aña pasa caba a bin ta treciendo dilanti cu loke ta sosode cu nos adultonan mayor no ta aceptabel y ta un berguensa y tristeza pa mira con nos grandinan tin cu biba.
Aña pasa Otmar a reuni cu organizacion OPPA y despues di esaki a bin afo y mustra riba e hecho cu mester duna atencion na e pensionadonan na Aruba. “MI ta kere nos ta e prome organizacion cu a sali afo y bisa cu nos tin entre 24 cu 28 mil pensionado na Aruba y di e total aki 14 pa 18 mil ta biba cu un entrada bou 900 Florin pa luna”. Tristo pa mira con ningun miembro di Parlamento ta papia riba esaki, ni oposicion y ta parse cu cada ken ta bezig cu nan propio agenda, lubidando cu tin un grupo grandi den nos comunidad cu merece atencion.
Inclusive Plataforma Nos Pais a bin cu e propuesta pa legalisa e 12 pa 15 mil indocumentado cu tin riba Aruba cu ta trahando, pero no ta pagando SvB, AZV, ni belasting. Si ta djis incluinan, ya caba por yuda e grupo di pensionadonan cu awe ta paga 9.5% di AZV, cual ya caba lo ta un alivio.
Tambe Otmar a menciona cu no por castiga e pensionadonan cu ta busca un entrada extra, manera bende pastechi, huur un apartament of busca un di dos trabao.
Un biaha mas, e ta aplaudi e iniciativa di duna atencion na nos grandinan y ta spera cu e bira un prioridad den maneho y no bolbe lague un banda, pasobra nos adultonan mayor merece y tin mester di e atencion awo!
