ORANJESTAD (AAN): E siman aki, Partido AVP a reacciona riba aumento di tarifa di gasolin na Aruba.
Segun e partido berde, e ta un cambio cu tin su efecto domino den henter e cadena di suministro y servicio, afectando hunto cu ne, e poder di compra di e ciudadano.
Segun AVP, ta prome ministro Evelyn Wever Croes a kita e descuento di 10 cen pa liter di gasolin cu tabata vigente te na 2017 durante Gabinete Mike Eman I y II. Kitando e reduccion aki ta haci cu Gabinete Wever Croes no por laba man sin mas awe y bisa cu e aumento ta netamente internacional.
Tambe Gabinete Wever Croes a aumenta e BBO di 3% pa 7%. E 7% aki ta worde paga den dos schakel riba gasolin. E schakel di FEMSA/RDA pa e gasolin station y di gasolin station pa e cliente. Tur esakinan si ta medidanan di gobierno cu awe ta haci e prijs di gasolin aun mas caro cu unicamente e efecto internacional. Segun AVP, pesey Evelyn Wever-Croes ta responsabel pa e castigo aki cu Pueblo ta pasando aden.
Nan a agrega cu ta e medidanan aki di Evelyn Wever-Croes ta locual ta haci cada aumento internacional aun mas severo y pisa pa pueblo. Eman ta bisa cu su gobierno a laga di cobra 12 miyon pa aña na e 10 cen di descuento aki 8 aña largo pa pueblo haya un alivio, practicamente 100 miyon a laga den saco di pueblo y e promer cos cu Evelyn Wever-Croes a haci ta kita e discuento aki di pueblo y riba dje subi BBO di 3% pa 7% locual ta dal pueblo den dos schakel, 14% ariba dje.
Pesey nan ta conclui den e contexto aki, cu ta Gabinete Wever-Croes ta carga un responsabilidad directo pa e peso di e gasolin cu ta azotando pueblo y cu awe ta azota comunidad atrobe. Segun AVP, tabata un iresponsabilidad di MEP, pa den tempo di campaña priminti di lo baha gasolin, sabiendo cu esey ta practicamente imposibel y ainda ta wardando e barco di Glenbert Croes cu gasolin barata yega. Obviamente tabata djis promesa fofo cu MEP a haci. Loke si e gobierno actual por a haci tabata di mantene e descuento di 10 cen, algo cu AVP si a logra den tempo hopi mas dificil pa entrada di Pais Aruba. Tambe mester a exonera gasolin di e BBO di 7%, pero esey tambe ta bay den saco di Gabinete Wever Croes.
