Parlamentario Eduard Pieters (PPA):
ORANJESTAD (AAN): Durante e rueda di prensa parlamentario Eduard Pieters a elabora riba e di tres punto di agenda cu tabata e Rijkswet HOFA. Un ley cu, segun PPA, ta representa un menasa serio contra Status Aparte di Aruba. Durante su bishita reciente na Hulanda, Pieters a combersa cu diferente miembro di Tweede Kamer y practicamente tur a reconoce cu e Rijkswet HOFA ta altamente controversial, specialmente pasobra e no tin sosten di mayoria di pueblo ni tampoco di un gran mayoria Parlamento di Aruba.
E echo cu un ley cu tin tanto impacto riba nos soberania fiscal y politico ta wordo pusha sin mandato democratico local, ta un señal alarmante pa nos democracia.
Desde comienzo di 2025 PPA ta alertando pueblo y e gremionan
Desde principio di 2025, fraccion di PPA a cuminsa cu un serie di reunion cu e gremionan comercial, e sindicatonan y e organisacionnan social, pa splica kico e Rijkswet HOFA realmente ta nifica y kico ta e peliger real pa Aruba. PPA a prepara y distribui un nota di minoria, cu argumento legal, economico y constitucional, splicando claramente pakico e ley aki no ta den beneficio di Status Aparte, hustamente ora Aruba ta celebra 40 aña di autonomia.
E mensahe tabata cla: HOFA ta un paso atras den nos lucha pa autodeterminacion.
Sin insistencia di PPA masha dia HOFA lo ta un realidad
“Durante un reunion reciente cu Raad van State, a keda cla cu Rijkswet HOFA ni sikiera tabata riba nan radar. Hulanda kier pa e gobierno nobo trata e situacion aki entre Hulanda y Aruba. Si no tabata pa insistencia continuo di PPA y oposicion, e ley lo tabata pasa sin debate serio masha dia y contra tur acto di bon boluntad pa tin sosten di pueblo y Parlamento.
Esaki ta mustra cu Aruba a cay den un zona di comfortabilidad peligroso. Status Aparte ta 40 aña, pero balor di autonomia ta desvaneci den mentalidad di gobierno”.
PPA ta aplaudi e iniciativa di ex-Minister Presidente Nelson Oduber cu su documentario tocante kico Status Aparte realmente a nifica, pa educa e generacion nobo y recorda cu autonomia no ta algo automatico, ta algo cu mester defende.
E lucha di PPA pa nos ta “baas den nos mesun cas”
Segun Eduard Pieters: “No por keda sin menciona e lider historico di PPA, Juancho Yrausquin, cu a lucha pa Aruba no acepta 12–8, pero pa mantene 8–8 den Antiyas Hulandes. Esaki tabata e motibo pakico Juancho Yrausquin a bandona AVP e tempo ey pasobra nan si a mantene 12-8. Juancho Yrausquin a percura pa Aruba a logra tin Pensioen General (awendia SVB), enseñansa gratis, proteccion social y dignidad economico.
PPA a haya hasta 15 asiento den Parlamento e tempo ey, pasobra pueblo a reconoce e liderato y e lucha pa bienestar di pueblo Arubiano”.
HOFA y e mentira di “surplus”
“Minister Geoffrey Wever a presenta e Rijkswet HOFA na e parlamentarionan di e islanan, pero hasta e parlamentarionan ey a cuestiona Aruba su posicion: Con bo por acepta HOFA ora bo tin surplus? E berdad ta cu Aruba ta riba e normanan di LAFT. No tin necesidad pa drenta den un RAFT pa presta placa. Paso unabes Aruba drenta e RAFT, nos no lo sali mas y nos lo perde nos autodeterminacion, cu tanto a lucha p’e. P’esey mes fraccion di PPA a vota contra presupuesto di Aruba, pasobra gobierno ta gaba cu tin surplus, pero kier sigui presta placa y riba dje tin ni un lista di inversion, pero bashi na contenido. No tin plan y mucho menos transparencia. Nos a mira esaki caba den e Plan Bo Bario den pasado, unda tabatin gastamento enorme di placa sin control,” Eduard a enfatisa.
Nos autonomia no ta na benta
Finalmente Eduard Pieters a señala cu Rijkswet HOFA ta contra tur principio di autodeterminacion. Aruba no ta un departamento financiero di Reino. Nos ta un pais cu 40 aña di Status Aparte. PPA lo sigui defende nos autonomia y autodeterminacion.
