Parlamentario Endy Croes:
- E ta considera Ministro Gerlien Croes un micro manager
ORANJESTAD (AAN): Parlamentario Endy Croes ta lamenta e direccion cu Minister actual a tuma pa cu aumento di salario di docentenan. AVP na 2016 a produci un rapport ‘Functiehuis’. Lamentablemente esaki a keda tira den lachi. Baba Herde tabata Parlamentario di 2009-2017, Marlon Sneek y Jennifer Reyes tabata Parlamentario di 2013-2021. Mervin Wyatt Ras tambe tabata Parlamentario di AVP di 2010 pa 2025.
Ningun Parlamentarionan di AVP no tabata tin interes pa pidi pa yama un Reunion Publico pa trata y aproba e Functiehuis momento nan propio gobierno tabata na mando.
Nan tur a sconde informacion y no tabata sincero cu e veld di enseñansa? Mi lo splica esaki awe.
Salaris nan proponi den ‘Functiehuis’ lo sobrepasa salarionan di BRA:
E ‘salarisschalen’ proponi den ‘Functiehuis’ pa enseñansa prepara pa AVP e tempo aya a resulta di lo sobrepasa salarionan regla den BRA. ( Bezoldigings Regeling Aruba). Es decir si a dal bay pa aproba y implementa esaki e lo a crea un ‘scheve verhouding’ pa cu tur otro salarionan di otro departamentonan di gobierno. Esaki ningun hende di AVP nunca a sali bisa of splica y a prefera di laga e ‘Functiehuis’ tira den lachi.
Rumbo diferente: El a splica cu Gabinete Wever Croes 2 a escohe un rumbo diferente. Pa por logra algo sigur pa e docentenan mester escohe un otro rumbo unda por trece cambionan den margen di ley na un manera mas rapido. Un Comision di expertonan incluyendo representacion di SIMAR a yuda traha riba un conseho ‘Leerkracht Beter betaald, Onderwijs Beter Behaald’. Esaki a keda cla y a presenta 4 opcion den luna di mei 2024.
Pesey a mira con Gerlien Croes a gaña recientemente den Parlamento cu esaki lo costa 34 miyon pa aña. Un di e 4 opcionnan lo costa gobierno 11 miyon pa aña unda lo a ‘trek recht’ varios aspecto y alavez tur docente lo a bay dilanti den nan salario. Esaki lo worde regla atravez di e ‘Landsbesluit Bezoldiging Onderwijspersoneel’( LBBO) y asina por logra e cambio mucho mas rapido. Intension tabata pa introduci esaki den luna di Augustus 2025
Ministro a drenta y corta: Nos ta lamenta cu Gerlien a corta den enseñansa asina cu el a tuma over. No obstante Gabinete Wever Croes 2 saliente a laga e conseho y e placa cla pa por ehecuta esaki nos a tuma nota cu e Minister encarga no tin e boluntad. Dia 28 di Maart 2025 momento e Coalicion nobo a aproba presupuesto 2025 nan a corta 2.9 den enseñansa banda di a corta 17 miyon di FCCA y 6.3 miyon den Husticia y Social.
Den luna di Augustus recien den presupuesto supletorio a bolbe corta 3 miyon “structural”den salario di docentenan. Si lesa e ‘vierde uitvoeringsrapportage ‘(UR) di 2024 CAft ta skirbi cu tin un Surplus di alrededor 477 miyon. Esaki ta e 500 miyon cu nos semper a papia di dije. Pues esaki ta e prueba cu nos a traha e placa y e placa te’y pa e aumento di salario pa e docentenan. E aumento lo costa 11 miyon pa aña di cual e Docentenan sigur merece. Pa esaki awor Gerlien kier haci ful un drama. Nos ta bolbe enfatisa di ta lamenta masha hopi e maneho di Gerlien Croes riba e tema aki. Duna e maestronan lokual nan merece. E trabao tabata cla. Cumpli awor!
