Parlamentario Clifford Heyliger:
ORANJESTAD (AAN) - Hulanda a anuncia recientemente cu den su presupuesto pa 2026 a aloca un total di 116 miyon euro pa Aruba y Corsou. Segun parlamentario Clifford Heyliger, esaki ta un desaroyo importante, pero lamentablemente e partido MEP ta manera caiman na boc’i riu cla pa bay cu e merito comosifuera ta un gran logro di nan gabinete.
Heyliger a puntra: “Esaki si ta un logro di MEP, pero e Rijkswet no? Atrobe MEP kier scoge kico e kier tuma credito p’e. Ora di ricibi regalo di Hulanda si ta prome den rij, pero ora cu mester asumi responsabilidad pa desastre financiero, e ora ey si no.”
Heyliger a referí tambe na e supuestamente “logronan” di gabinete Wever-Croes den tereno di energia. Durante 7 aña y mey, MEP a papia hopi, a biaha rond di mundo y a priminti combustible mas barata, hidrogeno y futuro sostenibel. Pero na fin di dia, no a produci niun resultado concreto.
“E unico energia cu MEP a logra produci den 7 aña y mey ta energia negativo – negativo pa pueblo, negativo pa progreso, negativo pa confianza,” Heyliger a agrega.
Parlamentario Heyliger a critica e nominacionnan di MEP den Raad van Commissarissen, caminda segun dje, no a sali niun resultado considerabel pa pueblo. Unico documento cu nan por mustra ta e famoso Overeenkomst van Opdracht (OVO) – un construccion cu ta mas pa beneficio di nan mes.
“OVO ta un golden handshake cu nan mes a inventa pa disfruta di dje. Mientras pueblo ta luchando cu costo di bida y falta di oportunidad, MEP ta crea mecanismo pa sigura nan propio saco,” Heyliger a splica.
Heyliger ta insisti cu pueblo mester wak e realidad: Hulanda ta duna Aruba acceso na fondo di 116 miyon Euro; esey ta danki na e continuacion y seriedad den gobernacion cu e gabinete nobo a demostra y no na MEP. E partido a gasta casi un decada ta papia di energia y sostenibilidad, pero na fin no a traha nada tangible pa Aruba.
“Pueblo ta merece transparencia y resultado, no propaganda,” Heyliger a conclui.
