ORANJESTAD (AAN) – Aunke el a sinta den Parlamento como parti di fraccion di POR, pa un tempo hopi cortico, pa Dellanire Maduro su experiencia como parlamentario tabata algo unico. Asina el a declara pa prensa.
El a haya oportunidad di representa comunidad den Staten, e preocupacionnan cu tin den pueblo, y na mes momento uza e conocementonan cu cada un parlamentario tin den nan veld, dependiendo di e leynan cu ta bin dilanti. Dellanire a subraya cu por a mira cu covid-19 den e aña cu a pasa, a hunga un rol sumamente importante y cuido tabata e tema cu mas a wordo papia riba dje unda a bin e parti di reforma di nos cuido medico. El a comenta cu esaki ta sumamente importante, pero alavez, mester tene cuenta cu esnan cu ta mas vulnerable cu e cambionan aki.
“Y esaki ta sigur, un di e aspectonan cu mi a percura pa semper, den cada reunion, vooral ora nos a papia di Landspakket, mi a trece dilanti cu mi no kier pa nos ciudadanonan tin cu bay scoge entre cuido y cuminda pa sobrebibi, por ehemplo. Esaki ta puntonan importante, y ta un reto cu e parlamento nobo lo bay tin cu atende cune. Pero mester busca un forma pa sostene esnan mas vulnerable no ta bay keda den un buraco cu nan no ta haya ayudo.
Como presidente di e Comision di Salubridad Publico y Cuido di nos Grandinan, den e aña Parlamentario aki for di September te cu awo, mi a pone hopi enfasis riba e parti di zorg, pero tambe riba e perspectiva for di punto di bista di nos grandinan; con nan ta percibi esaki y con nan ta sintiendo esaki”, Dellanire Maduro a señala.
El a subraya cu ta importante pa trece esaki na luz, pasobra nos grandinan a contribui na nos pais, y ta importante pa keda tene na cuenta con e impacto grandi aki, ta bay afecta nan y con ta bay percura pa bin cu cierto excepcionnan pa esnan pensionado of di edad grandi, pa e cambionan cu ta bay bin, teniendo cuenta cu e cantidad di pensioengeld cu nan ta haya y cu cosnan enberdad, no ta barata tampoco.
“Pues mester bay tin un evaluacion riba con ta haci e cambionan aki, pero na mesun momento cu bo ta percura pa no bay crea pobreza tampoco”, Dellanire Maduro a expresa.
