“POR lo keda vigila di pafo…” - ORANJESTAD (AAN) — Alan Howell, kende a fungi como lider di fraccion di Partido POR den Parlamento den e periodo 2017-2021,
y awo como lider mes di POR, cu a participa den e ultimo eleccion pero no a logra asiento, na su despedida di su trayecto politico aki, a expresa pa prensa, cu e ta gradici Dios cu a dune e oportunidad di a bira miembro di Parlamento, cu ta e Organo di mas halto di nos pais.
“Mi ta kere cu mester ta un honor pa tur persona ta un Parlamentario, y den mi caso hasta mi tabata Vice-presidente di Parlamento, kiermen mi ta sumamente honra y agradecido pa e oportunidad cu mi a haya aki, pa por a traha na bienestar di nos pais Aruba”, Howell a expresa.
El a comenta cu e ta sigur un di e parlamentarionan cu a presenta mas tanto mocion pa bienestar di nos pais y a menciona cu a cuminza un capitulo awo unda ta bay tin un Parlamento nobo, y e ta lamenta cu pueblo no a duna POR e sosten pa ta bek den Parlamento, y e partido tin cu biba cu esey y respeta e voz di pueblo cu ta e voz di Dios, pero e ta yama danki na tur persona cu a pone nan confianza cu e support di voto y cu a yuda den e campaña cu a keda atras.
“Di akinan, mi kier a desea cada parlamentario cu ta bay drenta den e constelacion nobo, tur clase di exito y mi kier a desea tambe exito na e gobierno nobo, cu ta bay asumi e responsabilidad como ministernan. Y por ultimo, mi ta kere cu si bo ta stima bo pais Aruba, ta bon so bo por desea bo pais si bo a drenta of no, nos ta desea lo miho pasobra nos sa cu loke ta bay bin den e dianan venidero, no ta bay ta dianan facil pa pais Aruba”, Howell a expresa.
El a conclui bisando cu Dios bendiciona cada Parlamentario cu ta bay sinta, y duna nan e sabiduria pa nan por bin cu lo miho pa nos pais, y mescos pa e gobierno nobo. POR ta keda di pafo, vigila con cos ta bay, y su persona lo sigui sirbi Aruba di cualkier forma cu e por hacie.
