Pa expresion di e lider di MAS di “no a los su pit-bullnan ainda”...
ORANJESTAD (AAN) – Solangel Dinmohamed-Lacle di Partido MAS, durante un encuentro cu prensa, a divulga loke a pasa den e ultimo reunion di e Partido, unda e tabata presente. Den su palabranan, esey tabata un reunion toxico.
Unico meta den e reunion tabata pa rebaha su persona y susha su nomber, unda si tabata tin un complot contra dje, e liderazgo di e partido a husgu'e unicamente pa no a silencia pueblo.
Pa no controla loke seguidornan of otro personanan cu a post riba facebook, indicando cu lastima cu no tur tabata seguidornan di Solangel.
“Lamentablemente, Aruba a sali y a para na e banda corecto di husticia y esey ta algo cu Partido MAS no por a deal cune”, el a bisa agregando cu e ta boga pa pueblo ta critico y actua no solamente riba politico sino riba cualkier persona cu actua fuera di ley y cu ta duna no yiunan un mal ehemplo.
Solangel a expresa cu e ta haya hopi interesante con lider di Partido MAS kier pa e silencia pueblo, pero ora un miembro di su partido ataca otro, e lider ta bira un spirito.
El splica cu tambe el a wordo acusa di ta liga cu Otmar Oduber. “Mi nunca tabata, mi no ta y hamas mi a sinta den ningun reunion cu señor Oduber ni a sostene ningun combersacion cune ni ningun persona liga na dje. Tur locual cu mi a logra te cu dia di awe ta a base di mi trabao duro, mi dedicacion y mi campaña ta un muestra di e sacrificio cu ami y mi famia a haci pa e pais aki”, Solangel a subraya.
El a menciona cu e ta wordo acusa cu e no a nace na Aruba, locual ta berdad y nunca el a nenga esaki. “Semper mi a sali cu cara na laira y bisa unda mi a nace y tambe mi ta bisa con agradecido mi ta na Aruba. Con duro ami kier traha pa e pais aki. Mi ta un educador na Aruba. Tur dia mi ta educa nos muchanan na Aruba. Mi ta un hende cu semper mi a hiba Aruba su nomber dilanti y semper a cargue cu hopi orguyo. Pues, esey ta otro argumento fofo cu nan kier uza akinan. Y mi no ta sinti mi ni menos ni mas Arubiano cu ningun hende”, Solangel a acentua.
“Mi a wordo amenaza tambe door di e lider di Partido MAS cu ainda e no a los su pit-bullnan. Awe mi ta haci señora Marisol Lopez-Tromp responsable pa e integridad fisico mi y di mi famia, pasobra esey ta un frase cu por wordo interpreta na diferente manera” e hoben a bisa.
Esaki tabata un reunion basta tenso y a demostre cu e no por ta den un partido cu tin e liderazgo di e calibre aki. “Sinembargo, mi a opta pa no retira pues Mi lo no a duna nan e gusto di retira prome cu nan a huramenta, y mucho menos prome cu formacion di gobierno. Mi a haci duidelijk pa nan si, cu mi no kier ningun chupon den mi boca, pa calma mi cu absolutamente nada. Unico puesto cu lo mi asumi y cu mi ta sigui para riba esey ta si mi wordo yama pa drenta Parlamento di Aruba, pasobra segun nos kiesverordening ami, si señora Aquanette Gunn tin un poco di honestidad ainda y señor Coster tambe tine, nan lo sa di honra e protocol ainda, pasobra ainda tin manera pa bo hacie y mi lo drenta Parlamento, pero no como un titere politico ni como un persona cu ta wordo domina pa un lider di partido. Lo mi drenta como un representante di pueblo!” Solangel a remarca.
Solangel a reitera varios biaha durante e conferencia di prensa aki, cu di tur loke el a papia e tin prueba di tur difamacion, cu ta den man di su abogado.
E lo no give up den politica. E ta considera cu esaki ta e comienzo di su carera politico y tur locual a pasa y cu el a siña hopi durante su campaña, lo ta pasonan fuerte pa su carera politico por sigui.
