ORANJESTAD (AAN) – Solangel Dinmohamed- Lacle, ken a participa como candidato riba lista di Partido MAS, a yama un conferencia di prensa pa duna su version, tocante loke a sosode cune, den seno di e partido.
Na prome lugar el a gradici pueblo di Aruba pa a sigui e desaroyonan politico na nos pais, asina di cerca, y muy particularmente loke ta concerni Partido MAS y di su persona. Seguidamente, el a haci un introduccion di locual ta e tema di e conferencia di prensa aki.
“Durante algun tempo mi a dicidi di keda keto, pero awe ta un dia cu mi ta kibra e silencio. Mi ta bay tene e rueda di prensa aki, den cuadro di transparencia y integridad: dos palabra cu ta nifica hopi pa mi, como ser humano, y tambe como un politico.
Awe, mi ta bay duna un declaracion di con despues di a firma un protocol dia 6 di Mei, yama ‘Protocol di Democracia Parlamentario’, momento cu e votonan individual a sali, ami no ta e persona cu a drenta Parlamento. Tambe mi lo bay aclara y trece mi banda di medaya di e video cu señora Aquanette Gunn, a publica di mi persona dia 6 di Juni, difamando mi bon nomber. Y mi lo splica kico ta mi posicion actual den partido MAS y kico a hiba na esaki”, Solangel Dinmohamed-Lacle a señala.
Protocol Democracia Parlamentario:
“Dia 6 di Mei nos a sinta den e prome partijraad di e partido y e lider di Partido MAS a propone pa nos tur firma un protocol. E protocol aki ta bisa cu e personanan cu mas voto lo ta esnan prome yama pa drenta Parlamento di Aruba.
Mi kier pone enfasis riba ‘prome yama’. E protocol aki a wordo firma door di tur candidato di Partido MAS, cu excepcion di candidato number 6, kende e anochi ey no tabata presente y no tabata un candidato oficial riba lista. E momento ey a duna number na cada candidato y a bisa cu number lo no ta importante, pasobra nos lo bay a base di e protocol. Nos tur a firma e protocol aki y nos tur a bay di acuerdo pa cumpli y honra esaki.
Naturalmente, mi sa y nos tur tabata na haltura cu tin un ‘kiesverordening’ y cu esey ta riba e protocol aki. Pero tambe, nos tabata conciente cu nos ta trahando cu personanan adulto cu a yama nan mes integro, sincero y confiable, y cu nos tabata firmando un protocol cu un lider di partido cu ta gaba di tin 23 aña di experiencia politico. E mesun lider di e partido aki, a bisa cu desde e momento cu el a wordo retira di gobierno di Aruba cu e ta un persona integro, y el a bisa tambe: ‘Mi ta prefera di ta mi so envez di forma parti di baina…’ Y hasta el a yama hendenan cu no a cumpli cu afspraaknan firma, pa spirito. Den e protocol aki, nos a acorda cu e personanan cu mas voto, y mi ta ripiti, ta esnan prome yama na drenta Parlamento di Aruba.
Mi ta conciente cu mi no a saca mi mes, pero mi kier aclarea cu mi a saca 2.5 biaha mas voto cu e candidato number 2 riba lista, y cinco biaha mas voto cu e candidato number 3 riba lista.
Ta bon tambe, pa recorda e lider di partido cu segun Kiesverordening, articulo 92, cu sin mi 189 voto partido MAS lo no a haya e di dos restzetel, anto nos lo tabata tin solamente un stul den Parlamento. Sinembargo, a dicidi pa no honra e protocol aki”, Solangel Dinmohamed a subraya.
Den otro articulo DIARIO lo sigui elabora tocante e conferencia di prensa aki.
