Otmar Oduber, lider Plataforma Nos Pais
*Tur esaki ta consecuencia di un parlamento cu no ta funciona
ORANJESTAD (AAN) – Otmar Oduber a sigui bisa den conferencia di prensa di Diaranzon, a subraya cu e hotelnan ta wordo proteha pa e ley cu no por traha mas hotel den futuro, pa nan haci mas placa.
Prijsnan ta bayendo basta halto, pero nan no ta contribui manera mester ta na e infrastructura di Aruba. El a señala tambe cu e retonan di nos turismo ta diferente, compara cu 12 aña pasa.
“Awe nos mester concentra riba producto, servicio, y riba e parti laboral”, Otmar Oduber a reitera. El a reitera cu e sector cu mas ta haci uso di RWZI ta e hotelnan, y mester cobra nan pa e servicio, y no haci Aruba mas caro ainda pa e turismo pasobra ta bay mata e “galiña di webo di oro”.
Na e pregunta di prensa, di con a permiti pa bin cu un medida cu ta beneficia un minister so y no e pueblo en general, y mirando cu ya caba turistanan ta kehando cu Aruba ta mucho caro, y si esaki ta falta di liderazgo of di un lider cu por pone tur cos na su lugar, Oduber a contesta cu tur esaki ta consecuencia di un parlamento cu no ta funciona.
Na e articulo aki ta wordo adhunta copia di un carta cu lider di Plataforma Nos Pais, a manda pa Minister Presidente, di fecha 30 di Januari 2024.
