Otmar Oduber, lider di Plataforma Nos Pais:
ORANJESTAD (AAN)—Lider di Plataforma Nos Pais, Otmar Oduber, den su conferencia di prensa Diaranzon 31 di Januari, a dirigi na e Parlamentarionan di Gobierno y Oposicion, puntrando nan si nan ta realiza cu nan tin cu papia riba labor, riba cambernan di hotel, riba trahado cu ta necesario na Aruba?
Oduber ta puntra e 21 miembronan di parlamento si nan ta realiza cu mester discuti riba e gastonan di gobierno y con pa baha e gastonan aki? Pero nan ta keda punta dede riba ken pa insulta personalmente, tur partido sin excepcion ta papia di con pa cera otro politico, tur kier cera otro, pero ningun ta papia riba e bienestar di e pais aki mas.
“Si nos no atende cu e realidad cu nos ta biba awe den e pais aki, e consecuencianan nos ta bay keda yore pa e futuro generacionnan”, el a subraya.
Otmar Oduber a yega te aki y a opta pa miembronan di prensa haci pregunta. Di e preguntanan di prensa por saca afo e siguiente temanan.
Refiriendo na e Planta di Bubali, Oduber a bisa cu tempo cu e tabata minister di infrastructura un rapport a wordo traha, DOW a trah’e y el a bay Ministerraad; e tempo ey tabata papia di un costo di 27 pa 30 miyon florin, pa pone un planta nobo di RWZI. Awo, el a scucha cu a bira 90 miyon florin, pues tres biaha mas caro.
“Mi no ta compronde di con. Expertonan lo mester sa, mi no sa cual e intencion ta. Ban pone cu ta 90 miyon mes; bo kier saca for di e turista 35 miyon dollar den un aña. Den dos of tres aña bo ta saca e placa e ora ey. Kico bo ta haci cu e resto? No tin un vision no tin un pensamento”, Oduber a señala.
El a añadi cu tempo e tabata minister el a bisa cu hotelnan tin un responsabilidad den Bubali Plas. 60% of mas di e awa cu ta wordo trata na Bubali Plas ta bin di hotelnan, y nan ta reconoce esaki tambe, Oduber a bisa.
“Wel, nan mester carga responsabilidad den dje. Anto e hotelnan mester paga pa e servicio, no e turista. Cu tur respet cu mi tin pa e hotelnan, no por keda proteha nan. Nan ta proteha caba pasobra nos a bin cu e ley cu no por traha mas hotel den futuro, kiermen despues di a traha esnan cu ta den construccion e momentonan aki. Tin un hotel mas cu segun mi, tin permiso pa wordo traha. Y djey no por bin ningun hotel mas”, Otmar Oduber a reitera.
