“Si bo tin e recibo, pakico sconde?” 

Fraccion di MEP ta cuestiona integridad di Minister Gerlien Croes 

ORANJESTAD (AAN): Despues di a pidi transparencia pa mas di tres luna, Fraccion di MEP ta lamenta cu Minister Gerlien Croes ta prefera di uza “excusa legal” en bes di mustra e pueblo un simpel recibo di e jet priva cu el a uza. Pa MEP, esaki no ta un pleito politico, sino un asunto di honestidad:

Un Minister cu ta gaña riba un recibo, por gaña riba cualkier otro cos di nos pais! 

Un wega di sconde

E situacion ta simpel. Minister Gerlien Croes a biaha den un jet priva. El a bisa publicamente cu “e mes a pag’e”. Parlamento a pidi’e un prueba di e pago ey (un recibo of transferencia). En bes di manda e prueba ey cu ta costa e Minister 5 minuut, e Minister a pidi 3 siman di extra tempo. Awor cu e deadline a yega, diripiente e Minister ta bini cu un carta bisando cu Parlamento no a pidi’e e recibo “na e manera corecto”. 

“Esaki ta un burla pa e inteligencia di nos pueblo. E Minister ta pretende di ta mas sabi cu su pueblo uzando palabra dificil pa sconde e berdad. Si bo tin e recibo den bo lachi, bo ta sak’e y bo ta mustr’e. Ora bo cuminsa busca excusa pa no mustra un papel, ta pasobra e papel ey no ta existi of tin algo mas scondi.”, parlamentario Tjon a indica. 

Pakico esaki ta grave?

Fraccion di MEP kier splica pueblo pakico e wega aki di Minister Gerlien Croes ta peligroso:

1. Falta di Palabra: Si un Minister por mira pueblo den wowo y gaña riba un biahe, con pueblo por confi’e cu placa di scol of deporte?
2. E ley ta pa tur hende: Ora cu abo mester paga pa haya bo plachi number di auto, bo mester tin bo comprobante den man pa bo hay'e, toch? Si bo no por prueba cu bo a pag’e, bo no ta hay'e. Awo ta mescos. Bo ta pidi e Minister un comprobante di pago pa su biahe priva, paso e di cu no ta bo placa di belasting a pag'e pero ta su placa di salario a pag'e. Bo ta pidi'e recibo pa bo wak y e ta draai rond pa 3 luna caba. Dus den gobierno di Aruba tin un Minister cu ta pensa cu e reglanan ey no ta conta p’e?
3. Pretende vs. Realidad: E Minister ta bisti un bachi di “profesionalismo”, pero su actonan ta mustra falta di seriedad, honestidad y transparencia. Un persona serio no ta hunga wega cu ley pa sconde informacion publico. 

E berdad tin mester di un solo papel

Fraccion di MEP lo no laga e asunto aki un banda. Transparencia no ta un fabor cu e Minister ta haci bo, e ta su obligacion cu bo como ciudadano. Nos no ta pidi un storia largo, nos ta pidi un solo papel: e recibo. Minister, ta basta di sconde e berdad. Aruba merece un gobernante cu tin e curashi di papia berdad!