ORANJESTAD (AAN): Parlamentario Tevreden oficialmente a manda un serie di pregunta oficial na minister Wyatt Ras den su rol como titular di Salubridad Publico.
E situacion ta alarmante, abnormal y spantoso na Aruba. Nunca antes nos a conoce un habrimento di aña cu tanto sucedido.
Nos tur a mira e dolornan cu falta di accion ta causa. Apesar cu Aruba tin placa den caha di gobierno, ainda nos tin lista di espera, scarsedad di personal, y aumento den casonan. Segun Tevreden no por ta asina cu como Aruba ta keda reacciona riba crisis enbes di presenta un plan duradero y structural cu solucionnan concreto.
“Nos ta keda papia di Salud Mental riba podcast y programanan, pero gobierno tin cifras, plan y placa pa inverti pero no tin accion. Nos comunidad merece transparencia y boluntad di e titular encarga”, Tevreden ta indica.
Escasez na specialistanan
Den e preguntanan cu Tevreden a haci na minister Wyatt-Ras entre otro ta riba e total cantidad di psikiatra y psicologo cu tin riba Aruba cu por brinda servicio pero tambe cuanto ta falta segun e norma universal. Pero tambe con ta pensa na duna sosten na instancianan di cual minister sa cu mester di apoyo di gobierno. Minister tin suficiente profesional rond di dje cu a bise caba cu tin un scarsedad structural, pero loke ta falta pa sa, ta cua paso minister ta bay tuma pa soluciona esaki o por lo menos cuminsa trece solucion.
Presupuesto
Aruba mas cu nunca tin un presupuesto cu por carga e gastonan cu mester haci pa yega na solucion. Pero minister tin di splica nos y pueblo con e ta bay atende cu esakinan. E tin di duna e fondonan un direccion pa por logra e meta. Pero mas importante ta, unda minister lo scoge pa priorisa: prevencion y ayudo social o ayudo clinico? E tempo ta pasa y nos no kier ricibi mas mal noticia, mester move. E extra placa cu a wordo crea di belasting y turismo ta di e pueblo su necesidad, splicanan unda bo prioridad ta como minister.
Hobennan y prevencion
No ta secreto cu e problemanan mental bou di nos hobennan ta sigui crece. Pesey e pregunta na minister cu si e lo pone enfasis riba un instituto o solucion pa nos hobennan sufriendo di problemanan mental. Nos ta mira nombramento di otro ministerionan pa atende hobennan, pero e ministerio cu tin e batata cayente den su scochi tin nos tur ta sinti e cayente cu ne.
Problemanan mental y suicidio no ta djis stadistica. E ta un alarma cu ta bati pa pone nos actua, y ta responsabilidad di gobierno y e minister di Salubridad y Asuntonan Social pa reacciona y atende unda cu e por cu ayudo y prevencion.
For di 2025 mi ta puntrando minister Wyatt Ras pa presenta un plan integral, un plan di accion na Parlamento di Aruba. Un plan cu puntonan di accion realistico y realisabel, pa asina pueblo por sinti cu e gobierno no tin salud mental como ‘bijzaak’ sino como prioridad nacional.
