Parlamentario Evelyn Wever-Croes
*Lo unico cu tin ta medida y promesanan haci cu no a wordo cumpli
ORANJESTAD (AAN): Manera ta conoci, e gobierno no di AVP-Futuro a yega su di 100 dia di gobernacion sin tin un gobierno completo, sin liderazgo, transparencia y sin ningun desaroyo pa loke ta pais Aruba. Parlamentario Evelyn Wever-Croes a expresa cu e situacion aki sigur ta uno hopi preocupante pa partido MEP, mirando cu nan a laga pais Aruba fuerte riba su pianan, den pleno desaroyo y cu un crecemento economico stabiel. Na momento cu Gabinete Wever-Croes a baha como gobierno, nan a laga atras un surplus di 500 miyon florin, di cual e gobierno nobo aki, si nan a sigui e ehempel di bon gobernacion, lo a continua cu e trabounan cu a wordo laga atras den beneficio di pais Aruba.
Kico comunidad di Aruba por mira despues di 100 dia di gobernacion di AVP-Futuro?
Parlamentario Wever-Croes a indica cu loke si partido MEP y comunidad completo por a mira den e ultimo 100 dianan aki ta varios medida cruel contra e pueblo.
Corta den presupuesto
Desde cu gobierno AVP-Futuro a sinta nan a corta den:
Husticia y asuntonan social cu 6.2 miyon florin
Salubridad cu 1.5 miyon florin
Enseñansa cu 2.9 miyon florin despues di promete di inverti mas den e sector aki
Presupuesto di FCCA strobando asina e construccion di casnan social
Presupuesto di varios otro fundacion cu tin mester fondo pa por sigui traha eficientemente.
Gas
Tabata tin un aumento di gas cu ta afecta comunidad grandemente, sin cu a duna splicacion di e necesidad, mirando cu Arugas a sera aña cun ganashi enormementew grandi, Pues aumento di e tarifa no tabata necesario.
Remedinan
Nan a promete pensionadonan di duna nan remedinan bek pero nan a bin cu un lista nobo di remedinan cu ta cay bou AZV, cu nan a kita, haciendo e situacion aun pio.
Tambe den e ultimo 100 dianan aki, e gobierno aki a mustra falta di liderazgo, di curashi, y un actitud di entrega prome cu negocia. Akinan Parlamentario Wever-Croes ta referi na e tema di Schiphol na unda nan a firma un MOU prome cu negocia, y no kier mustra Parlamento kico a wordo firma. Tambe pa loke ta e tema di rijkswet, na unda nan a bisa cu nan ta acept’e prome cu nan a negocia.
Promesanan kibra
E gobierno tambe a cuminsa admiti cu e promesanan cu nan a haci durante campaña no por wordo cumpli. Y aki Parlamentario Wever-Croes ta referi na e promesanan haci prome cu eleccion, na unda partido Futuro a promete di lo no forma un gobierno cu AVP pero esaki ta e prome cos cu el a haci. E promesa di hisa pensioen cu 700 florin tampoco lo wordo realisa. Nan a his’e cu 250 florin y no lo his'e. mas.
Otro promesa cu nan a hasi ta cu nan lo goberna cu INTEGRIDAD, pero den nan acuerdo di gobierno, e palabra INTEGRIDAD no ta aparece ningun caminda.
Ademas, nan a priminti cu lo duna hende trabou despues di un solicitud habri, y basa riba capacidadnan di e persona. Sin embargo, e realidad ta net contrario. Nan a yena Bestuurskantoor yen yen caba, sin ningun solicitud habri, y nan a kita hendenan cu a pasa un procedura di selección riguroso, pa pone hendenan di reputacion dudoso.
Parlamentario Wever-Croes a expresa cu si e gobierno aki tin di berdad e miho interes di e comunidad na pecho, nan lo a sigui cu e trabounan cu Gabinete Wever-Croes a laga atras cu curashi, transparencia, y liderasgo. Desafortunadamente esaki no ta e caso, y awe 100 dia despues di formacion di e gobierno actual, no tin nada pa mustra cu e gobierno aki ta trahando di berdad.
