Otmar Oduber di PPA
ORANJESTAD (AAN): Lider di fraccion di PPA, Otmar Oduber a indica cu durante e reunion di diabierna ultimo, e kier a para keto un rato na un aspecto sumamente importante y el a vocifera esaki tambe na Minister President den parlamento. Otmar a refresca memoria y e historia con Aruba a yega na su Status Aparte y con Aruba a uni y forma un sort’i frente nacional, pa asina lucha den nomber di henter e pais Aruba.
Exito di Status Aparte
“Den tur lucha cu Aruba tabatin den pasado, semper tabata e union di e comunidad ta loke a forma e base solido y fuerte, unda a logra exito grandi den e añanan 40-50, ora cu abuelo di Prome Minister, Mike Eman, a bisa cu nos mester bringa pa ta ‘baas den nos propio cas’ y a cuminsa cu e lucha pa Status Aparte”, Otmar a subraya. Den e tempo ey, Aruba a logra haya e cantidad di firmanan necesario pa sigui cu e lucha di Status Aparte. “Despues Betico Croes a sigui cu e lucha aki y finalmente, ruman di e Prome Minister actual, defunto Henny Eman hunto cu Nel Oduber a sa di kita pechi politico y pone pais Aruba na prome luga y yega na otro. Pues esaki ta un ehempel cla, con ora cada biaha tabatin diferente constelacion politico yega na otro, a logra cosnan grandi pa nos pais na momento cu tin e sosten di e pueblo,” Oduber a comparti.
Mesun Situacion
Segun parlamentario di fraccion PPA, Otmar Oduber, por considera cu actualmente nos ta den casi e mesun situacion y nos mester cana e proceso aki hunto. “Mi ta haya falta di e gremionan, envolvimento di comunidad, mi no ta mira e accion di gobierno pa bay combersa cu e sindicatonan, e gremionan comercial y comunidad y niun, mescos cu nos como Parlamentario, no sa nada. Y p’esey mi a sali cu un poco preocupacion, paso e gremionan etc. mester ta bon informa pa nos sali como un frente nacional, manera PPA ta bogando p’e. Paso no por descarta cu e decisionnan cu ta bay tuma cu e Rijkswet aki, tin consecuencia directo pa pueblo y pa comerciante y nos tur sa esey”, Otmar a expresa.
Frente Nacional ta urgente
Otmar Oduber a sigui elabora tocante e contenido di Rijkswet, cu ora bo tin cu bay mantene bo na mes na e normanan, kico cu nan ta, bo mester percura pa pueblo ta para bo tras y den e negociacionnan tambe bo mester percura pa bo tin un frente nacional riba e topico aki. Den e reunion den Parlamento, Otmar a expresa: “Mi a pidi Minister President y henter gobierno, pa evalua y wak con nan por hinca henter e ronda di consulta den e planficacion actual. Cuminsa cu ronda di consulta y combersa cu e gremionan, y ta habri, transparente y honesto tambe cu nan, pa nan por duna bo apoyo. Semper y cuando esaki ta na bienestar general di nos comunidad y di tur gremio na Aruba,” Otmar a finalisa bisando.
