ORANJESTAD (AAN): ‘Periodista pa un Dia’ 2023 a continua diabierna atardi 9 di juni. Un proyecto importante pa stimula nos muchanan pa un posibel profesion den periodismo. E hobennan Jade Isa Pietersz, Raybert Liu, Natalia Sarai Alvarado Lizardo, Ariella Werleman, Lindomar jr. Kock y Henry Laclé a drenta e sala di Conferencia di Prensa di Gobierno di Aruba hunto cu nan mayornan yen di entusiasmo di ta
‘Periodista pa un Dia’ y conoce y haci nan preguntanan na Prome Minister Evelyn Wever-Croes.
E periodista invita e siman aki pa splica e muchanan mas tocante e trabou di periodismo y prepara nan pa nan encuentro cu Prome Minister den e Conferencia di Prensa Hubenil tawata señor Patrick Everon.
Patrick ta un hoben di 30 aña di edad y a studia Media & Entretenimento. El a sigui su estudio na unda el a siña e detayenan di diferente sector di media, manera print (corant y revista), industria di musica, radio, social media y television.
Actualmente Patrick ta trahando na nos planta nacional Telearuba, como editor y periodista. Patrick ta bisa cu e trabou di periodista semper ta trece cosnan nobo pa un persona. Un periodista por educa un otro persona masha hopi mes riba diferente sorto di topico pa yuda e comunidad cu informacionnan importante, y na e manera aki trece dilanti un storia cu por ta valido. Patrick su conseho pa nos muchanan ta pa semper sigui nan soño pa loke nan kier bira den futuro.
Sandra Croes, presentadora den Conferencia di Prensa di Gobierno di Aruba, cu hopi entusiamso pa ricibi nos muchanan alegre, despues cu hopi dedicacion a conta un tiki di su trabou den Conferencia di Prensa di Gobierno di Aruba. El a encurasha e muchanan pa nunca tin miedo di para dilanti di un publico pa haci e trabou cu nan gusta haci y tambe a duna tips con pa deal cu miedo ora ta dilanti di camara.
E muchanan tawata hopi contento pa encontra cu Prome Minister den sala di Conseho di Minister y a haya splicacion con Gobierno ta traha y di e desicionnan importante pa Aruba cu ta sali for di e reunionnan di Conseho di Minister.
Despues a sigui e Conferencia di Prensa Live cu a wordo pasa na TeleAruba y riba pagina di Facebook di Gabinete Wever Croes 2. E muchanan cu gran deseo pa conoce mas di e bida, estudio, trabou y hobby di Minister President, a haci preguntanan hopi al caso pero tambe algun a haci preguntanan tocante maneho di Gobierno, medio ambiente, salud, educacion, bullying, y un pregunta cu sigur a resalta tawata si tawata dificil pa Prome Minister atende cu Covid. Prome Minister den tur trankilidad y contento a contesta cada pregunta di e 6 ‘Periodistanan pa un Dia’ di e siman aki.
“Mi ta contento cu un otro atardi ameno cu nos ‘Periodistanan pa un Dia’ na unda nos muchanan a siña hopi di loke ta e trabou valioso di ta un periodista. Como un pais cu ta respeta su mes, ta hopi importante pa nos tin periodistanan cu ta trece semper e berdad pa e pueblo. Pa Gobierno di Aruba ta importante pa nos muchanan scucha di mandatarionan tur loke Gobierno ta haciendo pa nan bienestar y futuro. Pasobra na final di dia, e desicionnan cu nos tuma awe ta na nan bienestar y ta nos muchanan mester bay carga den futuro”.
Den nomber di Gobieno di Aruba, Prome Minister ta gradici tur esnan cu a haci ‘Periodista pa un Dia’ posibel y un exito un biaha mas. Danki tambe na señor Patrick Everon pa su tempo pa splica nos muchanan mas di e trabou pa informa pueblo. Danki na e mayornan pa permiti nan yiunan participa y danki special na nos muchanan cu a participa.
