ORANJESTAD (AAN): Dialuna mainta den un conferencia di prensa, Minister Geoffrey Wever hunto cu Departamento di Asuntonan Economico, Comercio y Industria (DEACI) a presenta e "Economic Outlook 2023-2024". E raport aki ta duna un proyeccion di e estado di nos economia basa riba ultimo informacion disponibel.
Pa 2023 ta premira un crecemento di 10,1% den termino nominal di
e Producto Interno Bruto (PIB), e indicador pa midi actividad economico. Cu un balor di 6.5 miljard Florin, esaki ta 106,7% compara cu e nivel na 2019 (6.1 miljard Florin).
Pa loke ta 2024, ta premira un crecemento adicional di 4,6% den termino nominal di e Producto Interno Bruto (PIB), cu un balor di 6.8 miljard Florin.
E expansion premira den actividad economico ta basa riba crecemento di nos industria turistico y crecemento di consumo y inversion priva. Esaki ta demostra confianza den nos isla como destinacion turistico y tambe pa inversion. E proyeccion di crecemento di economia di Aruba ta den liña cu e ultimo expectativa economico di Centrale Bank van Aruba cu ta premira un crecemento economico di 9,1 porciento den termino nominal den 2023.
Pa facilita proyeccion di e economia di Aruba, DEACI ta haci uzo di e modelo macro-economico MARUBA. E modelo MARUBA ta basa riba e Cuentanan Anual di Pais Aruba publica pa CBS y ta refleha e funcionamento di e economia di Aruba. Maneho di e modelo MARUBA ta cay bao responsbaylidad di DEACI. Pa yena na e proyeccionnan economico, DEACI ta den dialogo continuo cu diferente instancianan y expertonan local, y a base di analisis di diferente desaroyo, ta produci proyeccionnan economico.
Ministerio di Asuntonan Economico, Comunicacion y Desaroyo Sostenibel conhuntamento cu Departamento di Asuntonan Economico, Comercio y Industria lo sigui monitor desaroyo di economia di Aruba.
Minister Geoffrey Wever kier gradici directora Maria Dijkhoff- Pita y drs. Judesca Briceño di DEACI cu ta haci e economic outlook posibel. E publicacion completo ta disponibel riba e website www.deaci.aw.
