Partido MEP:
ORANJESTAD (AAN): AVP ultimo dianan kier pa Pueblo kere cu Parlamento mester haci loke Gobierno di Hulanda bisa. Prome ta Mike Eman, awor ta Rycond do Nascimento. Esaki ta e campaña nobo cu Eman, Ryçond y Partido AVP ta hiba despues cu Prome Minister a anuncia cu Gobierno lo paga e 5% bek na empleadonan di sector publico y semi publico. Esaki a haci nan dolor te den nan weso y ainda nan ta cana rond cu e dolor aki cu ta haci nan pensa y papia disparate.
Ta tristo cu ambos, Eman y Ryçond, ta hurista y awor kier pretende cu na Aruba no ta Parlamento tin e ultimo palabra sino Gobierno di Hulanda. Cu esaki nan ta demostra nan cara colonial berdadero. Ta un lastima cu djis pa finnan politico partidario, nan ta recuri na un nivel asina baho. Bo lo a pensa cu AVP completo lo a para pa e independencia cu un Parlamento mester tin y lucha den union contra Hulanda. Pero loke Partido AVP, especialmente Eman y Ryçond kier, ta pa Parlamento bira un ‘stempel parlement’.
Pero AVP, Mike y especialmente Rycond, e mascarada berdadero a cay y tur hende ta mira cu nan ta djis titere politico. Awo pueblo por wak na ki banda Partido AVP ta para di berdad. Loke ta combini nan politicamente awe, nan ta bisa algo y si mañan no ta combini nan mas, nan ta bisa net contrario. Pero poco poco hasta votadonan di AVP ta ripara cu asina, AVP lo no lanta cabes nunca mas. Den apenas 8 aña nan a bay di un partido di 33 mil pa 18 mil voto na 2021. Segun encuesta independiente e cantidad aki lo sigui baha tanten cu Mike, Ryçond y Gerlien ta na cabes.
