Partido MEP:
ORANJESTAD (AAN): Siman pasa tabata sin duda un siman hopi importante. Gabinete Wever-Croes II cu Premier Evelyn Wever -Croes na timon, semper a pone pueblo na prome luga. Nan ta compromete nan mes y nan ta cumpli.
Premier Evelyn Wever-Croes a priminti cu lo bringa corupcion. Awor e instituto Internacional Caribbean Financial Action Task Force (CFATF) tambe a confirma cu e esfuersonan di Gobierno bou liderazgo di Evelyn Wever-Croes, a duna Aruba un evaluacion excelente den combati labamento di placa y corupcion. Esaki no kiermen cu nunca mas lo tin corupcion pero esaki kiermen si cu corupcion no lo keda impune. Cu esaki e forma cu partido AVP y su lider tabata haya placa di campaña tin cu stop.
-Roberto Rincon
Pa esnan cu por a lubida, durante campaña na september 2013, Mike Eman a haya un donacion di Roberto Rincon di 50.000 dollar pa su campaña politico. Roberto Rincon ta un criminal Mericano-Venezolano cu a wordo condena recientemente pa cumpra funcionarionan den Gobierno pa haya su gusto. Y na Aruba despues di a haci e donacion cuantioso ey na Mike Eman, Roberto Rincon a haya permiso y tereno. E caso aki ta bou di investigacion ainda.
Awor cu e leynan cu Gabinete Wever-Croes a introduci y cu e evaluacion di CFATF, e tipo di fechorianan aki manera esun di Mike Eman, no lo por pasa mas. Danki Gabinete Wever-Croes pa cumpli cu e promesa di combati e tipo di labamento di placa y corupcion aki.
Partido MEP ta gradici tambe e stuurgroep AML/CFT y DWJZ cu a lidera e trabounan pa asina Aruba logra un resultado excelente di e evaluacion di CFATF. Partido MEP ta gradici Minister di Finansa Xiomara Maduro cu a brinda asistencia cu su experticio den e proceso aki. Danki tambe na Minister President Evelyn Wever-Croes pa e logro aki. Pabien Aruba cu e resultado positivo aki. Pa Partido MEP y pa Gobierno di Aruba, combati corupcion y labamento di placa ta prioridad
