*Tambe a informa Plataforma den Reino riba proceder di Marlon Sneek
ORANJESTAD (AAN)-- Parlamentario Rocco Tjon, di Fraccion di MEP, a declara publicamente cu Diahuebs awo, 30 di September, el a haya su mes obliga di entrega un keho contra Presidente di Parlamento, cual el a entrega na Gobernador, pero tambe el a haya importante pa informa tur e Parlamentonan den Reino, pa nan compronde con e Presidente di Parlamento, ta mina e derecho cu cada Parlamentario tin.
“Manera boso sa, ta desde December aña pasa, mi a solicita un reunion cerca Presidente di Parlamento, cu Minister Gerlien Croes. Mi a mand’e 15 recordatorio pa yama e reunion aki. Anto awe, nos ta wordo notifica cu el a yama un reunion similar cu e mesun minister aki, pero riba peticion di otro Parlamentario; parlamentario di Partido AVP. Anto como Presidente di Parlamento bo no por uza e ‘willekeur’. Bo ta akinan, pa salvaguardia e derecho di tur parlamentario, pa di e forma ey bo garantiza tambe cu nos estado di derecho ta funcional. Cu cada Parlamentario por haci su trabao di control. Imagina bo, señor Hart a haci un peticion dia 9 di September, su peticion ta drenta oficial na Parlamento dia 11 di September, y mañan Marlon Sneek a yama su reunion.
Mi peticion ta data for di December 2025, 15 recordatorio a wordo manda pa señor Marlon Sneek y te dia di awe e no por yama e reunion aki. Anto, nos ta considera esaki sumamente serio, caminda practicamente, democracia no ta wordo sirbi, pasobra ta e derecho di cada un cu ta sinta akiden ta pa por controla gobierno. Y pa e motibo aki, nos ta manda informa Gobernador riba e practica aki, y esaki ta un ehemplo.
Nos tin tambe 15 peticion haci pa un reunion cu Minister Wendrick Cicilia, nos tin mas di seis reunion pidi riba HOFA, y ningun di e reunionnan ey ta wordo yama y p’esey nos a haya necesario pa awe informa tur plataforma den Reino, di e proceder di Presidente di Parlamento”, Parlamentario Roco Tjon, di fraccion di Partido MEP, a reitera.
