Presidente di Parlamento Marlon Sneek a relata:
ORANJESTAD (AAN)-- Manera ta conoci, Diahuebs 24 y Diabierna 25 di September ultimo, atrobe tabata tin un reunion di Parlatino na Aruba, despues di 15 aña cu esaki a tuma lugar na nos Isla.
Presidente di Parlamento, señor Marlon Sneek, den entrevista cu Matutino DIARIO a relata tocante e dos dianan di reunion aki, unda tabata tin dos comision invita.
“Nos tabatin invita e Comision di Medio Ambiente y Turismo, y e Comision di Agricultura, Cria y Pesca. Cada Comision a haya un dia di reunion den Sala y un dia den veld. Dus, nos a bay, entre otro, na WEB Aruba NV pa nan haya un bista con nos ta produci awa, con e areglo entre WEB y e Agricultornan ta pa yega na awa pa yega na e parti di nan trabao, nos a bay na AWSS tambe pa nan wak tambe con nos ta atende cu e awa residual y e proyeccionnan pa por haci di e awa aki uno di calidad cu por uza, por ehemplo, den e parti di agricultura. No directamente pa e berduranan, pero pa matanan manera palo di coco, cu por uza pa gasta menos awa pa e negoshi aki. Tambe nos a hiba nos invitadonan pa tene nan lunch na EPB, y por a haya un bista con nos hobennan mes ta prepara cuminda y duna servicio”, Sneek a duna di conoce.
Presidente di Parlamento a sigui splica cu e invitadonan a bishita Pius X School, na Dakota, pa nan por a mira con e programa “Movecion y Salud” ta wordo duna.
“Un metodo cu ta di eerste pa 6de klas, caminda bo ta haci mucho mas conciente riba loke e mucha ta come ycon ta prepara, tambe, cumindanan mas saludabel. Nos a cera e reunion cu un presentacion di Minister Geoffrey Wever, na Cas Veneranda, caminda cu el a duna un bista tocante kico ta nos prediccionnan pa loke ta e sector primario, entre otro cu nos a busca algun bestia di afo, pa por drecha e raza cu nos tin, con nos ta haci cu e parti di pisca, e piscadornan, kico nos tin na legislacion riba esakinan, y tambe nos a papia riba e procesonan cu e minister ta bezig cu ne, pa por tin e Agripark cu e kier bin cu ne. Eynan nos a haya diferente intercambio pasobra den e grupo di Parlamentarionan tin di nan cu tambe ta ganadero, agricultor, y tambe a duna nos idea con nan ta hacie den nan pais, y e tecnologia cu ta wordo uza den nan pais, p’asina kizas bo por haya tecnologia cu ta sali mas barata y cu bo ta keda produci loke bo pais ta demanda”, Presidente di Parlamento Marlon Sneek a señala.
