Parlamentario Evelyn Wever-Croes:
ORANJESTAD (AAN): Un tema cu ultimamente ta keda ripiti den e ultimo lunanan, ta esun di rijkswet HOFA. Partidonan politico tin diferencia di opinion si e ley aki tin beneficio pa nos pais of no. Un tema hopi importante pasobra ta trata aki, no di ken a firma of ken no a firma, sino di loke e ley aki por significa pa futuro di nos pais. Den su disertacion den e reunion publico den Parlamento diamars ultimo, Parlamentario Evelyn Wever-Croes un biaha mas a splica kico e ley aki ta encera den realidad.
Segun Wever-Croes, Aruba ta den un momento hopi decisivo den nos historia na unda cu nos mester scoge si nos ta sigui riba e caminda di autonomia y dignidad of nos ta laga un gobierno di un otro pueblo tuma decision pa nos. E ley aki, e parlamentario a enfatisa, ta duna mas poder na Hulanda pa manda riba finansas di pais Aruba.
Parlamentario Evelyn Wever-Croes: “Apesar cu e ley aki ta contene algun aspecto cu ta miho cu loke nos tin den e leynan actual, e ta contene tambe algun articulo cu ta viola nos constitucion y otro stipulacionnan cu ta crea riesgonan hopi grandi pa Aruba, pa e ciudadano y su cartera. A cambio di esaki, Aruba lo paga menos interes, pero ki bal paga menos interes, y haya mas placa den caha di gobierno, y toch no ta e gobierno aki ta bay dicidi kico pa haci cu e placa extra aki. Kico abo lo scoge?”
